Skip to content
د ختیځ ننګرهار ولایت لعلپورې ولسوالۍ په بیګانانو کلي د یوه ښوونځي مخې ته د دوشنبې پر ورځ د « ۱۴۰۰ کال د مرغومې پر ۲۱ مه » غرمه مهال چاودنه شوې،چې له امله یې ۹ ماشومان وژل شوي او ۴ نور ټپيان دي.
د ننګرهار د رسنیو مرکز پر خپله ټوېټر پاڼه د پیښې پخلی کړی او چاودنه یې د هاوان د ناچاوده سرګلولې له امله یاده کړې ده.
د ننګرهار رسنیو مرکز:« د ننګرهار ولایت لعلپورې ولسوالۍ بېګانانو کلي کې، د جوارو پولی پلورونکي له لورې د یوې زړې هاوان مرمۍ ټکولو له امله چاودنه رامنځته شوې، چې له امله یې ۹ ماشومان شهیدان او څلور ټپیان شوي دي.»
د دغې پيښې ټول قربانیان د یوه ښوونځي زدهکوونکي دي،چې عمرونه یې له ۱۵ کلونو کم ښودل شوي.
کورنیو چارو وزارت هم د ننګرهار لعلپوره کې چاودنه تائیدوي،خو دا یې رد کړې،چې ګواکې چاودنه د هاوان مرمۍ له امله ده.
یاد وزارت رسنیو ته په لېږلې خبرپاڼه کې ویلي، دغه پېښه د ګازو ډبې د چاودنې له امله رامنځته شوې ده.
د کورنیو چارو وزارت د خبرپاڼې یوه برخه:« نن ورځ غرمه مهال د ننګرهار ولايت لعلپورې ولسوالۍ په مربوطاتو کې، د جوارو د پولیو پلورونکي د ګازډبې چاودنې له امله د يوه ښوونځي ۹ تنه کوچني ماشومان شهیدان او یوشمېر نور يې ټپیان شوي دي.»
کورنیو چارو وزارت وايي، د پيښې ټپيان د درملنې لپاره د جلال اباد ښار حوزوي روغتون ته وړل شوي،خو دا چې وضعیت یې څومره ډاډمن دی، په اړه یې کره مالومات نه شته دی.
