د ګرديز– ډنډ پټان سړک چې شاوخوا ۸۵ کیلومټره اوږدوالی لري، د دې ولایت له نهو ولسوالیو تېرېږي او له پښتونخوا سره د سوداګرۍ لپاره هم مهمه لار بلل کېږي. مسوولين وايي، د دې سړک د رغونې په لومړي پړاو کې به د ۷۰۰ میلیونه افغانیو په لګښت د ۲۵ کيلومټره برخې کار بشپړ شي.
د پکتیا د ټولګټو چارو رییس نیاز محمد حنیف وايي: « د دې سړک د لومړي لاټ ۲۵ کیلومټرو لګښت تقریبا ً ۷۰۰ میلیونه افغانۍ کېږي. دا سړک د مرکز له صفري نقطې څخه تر بلدې بازار پورې دوه لینه دی او ۴۰ متره سور لري.»
ځایي چارواکي دغه راز وایي، ورته پروژې به د دې ولایت د خلکو هر اړخیز پرمختګ کې مهم رول اداء کړي او ترڅنګ یې ډاډ ور کوي چې د ولسي د ستونزو د حل په موخه دې ولایت کې د یو شمیر نورو پروژو چارې هم پیل شوې او د ځینو لویو پروژو چارې به په نږدې موده کې پیل کړي.
د پکتیا د والي مرستیال انعام الله صلاح الدین وايي: « د مچلغو بند منظور دی، یوازې د ملي پراختیا له شرکت سره یې څه حسابي پاتې ده چې هغه خلاصه شي، بیا به یې کارونه پيل شي. په روحاني بابا کې د ګاویانو بند هم منظور شوی، یوازې تدارکاتي کارونه یې پاتې دي. د سټو کنډو سړک چې ۲۵ کیلومټره دی، د دې سړک د جوړولو منظوري هم راغلې ده.»
په همدې مهال، د پکتیا اوسېدونکي د یاد سړک د جوړېدو هرکلی کوي او له چارواکو غواړي چې د کار پر کیفیت جدي څارنه وکړي. دوی زیاتوي، دا سړک به د خلکو تګ راتګ او سوداګرۍ برخه کې ډېره اسانتیا رامنځته کړي؛ خو وایي په کار ده چې د پاتې برخې چارې هم ژر پیل شي.
د پکتیا اوسېدونکی حاجي محمد وايي: « موږ ټول ولسونه ډېر خوشاله یو، که په دې سړک کې زموږ ځمکې ځي یا کورونه، خیر دی لاړ دې شي، خو چې سړک جوړ شي.»
قومي مشر عبدالمجید رنجبر وايي: « دا یوه ټرانزیټي لاره هم ده، نو باید حتمن جوړه شي.»
د پکتیا اوسېدونکی محمد اصف وايي: « دا لار د ټرانزیټ له پلوه ډېر اهمیت لري، خو ډېرې ستونزې یې لرلې، اوس چې په اساسي توګه جوړېږي، دا به ډېر ښه شي.»
د معلوماتو له مخې، د ګردېز– ډند پټان سړک ټولټال ۸۵ کیلومټره اوږدوالی لري او د دې ولایت د نهو ولسوالیو په مسیر تېریږي. د دې سړک لومړی لاټ چې ۲۵ کیلومټره دی، د دولت له بودیجې په اساسي ډول جوړېږي چې د پاتې برخې چارې به یې هم په تدریجي ډول ترسره شي.
