Skip to content
په هلمند ولایت ځايي مسوولین وايي، په دغه ولایت کې د کبانو د روزنې فارمونو شمېر ۳۶۰ ته رسېږي،چې هر کال په اوسط ډول ۱۳۵۰ ټنه کبان تولیدوي.
فارم لرونکي بیا وايي، د کبانو دغه تولید له بهرنیو هېوادونو د کبانو د راوړلو اړتیا کمه کړې ده.
هلمند کې یو تن فارم لرونکي محمد نبي وايي:« دلته اوس د کبانو د فارمونو شمېر زیات شوی دی. تولید یې هم زیات شوی. څه موده مخکې ګاونډي هېواد پاکستان خپله دروازه تړلې وه، خو زموږ اندېښنه نه وه،ځکه موږ اوس د کبانو د تولید په برخه کې پر مختګ کړی. اوس موږ د پاکستان کبانو ته اړ نه یو.»
د فارم لرونکو په خبره، له نورو ولایتونو هم خلک د کبانو خوړلو او د مېلې لپاره دې ولایت ورځي.
هلمند ته د مېلې په موخه تللی یو کس وايي:« موږ چې کله هم دلته هلمند ته راځو،نو د کبانو د غوښې خوړلو مېله دلته نه هېروو،ځکه د دې ځای د کبانو غوښه ډېر ښه خوند لري.»
ځايي مسوولین وايي، د کبانو دا فارمونه پر ۶۰۰جریبه ځمکه جوړ شوي،چې د ښه عوایدو تر څنګ یې ګڼ شمېر کسانو ته کاري زمینه هم پیدا کړې.
