کابل ښار، هغه ځای چې هر سهار يې رګونو ته په ورته سړکونو کې زرګونه موټر تګ راتګ پيلوي، خو د خلکو شکايتونو له مخې، په دې ښار کې د موټر چلوونکو له لوري ټرافيکي قوانينو ته کمه پاملرنه د دې سبب شوې چې ټرافیکي پېښې او بې نظمي زياته شي.
د دې ښار له ځينو سیمو د ګڼه ګوڼې او موټروانانو بې نظمۍ له امله بېرته راوتل، ستر زړه او حوصله غواړي.
په میوند جاده کې ټرافيک پوليس شته، خو د ګڼې ګوڼې له امله اړ کېږي چې موټر چلوونکو ته په خلاف لاس د وتلو اجازه ورکړي.
د کارته مامورین یا پولیتخنیک درې لارې کې هم ورته وضعيت دی او موټر چلوونکي ټرافيکي اشارو ته د کتلو په ځای، له قانوني وېرې پرته په ډاډ زړه په غيري اصولي لار د وتلو هڅې کوي.
خو د ښار په ځينو سيمو کې د نظم نه مراعتولو لامل ښايي غير فعالې ټرافيکې اشارې هم وي او له خلکو سره دا پوښتنه پيدا کېږي چې دلته د بې نظمۍ مسوول ټرافيک پولیس که موټروانان دي؟
د کابل یو تن اوسېدونکی وايي: « د کابل د څلور لارو اشارې اکثریت خرابې دي، که دا اشارې فعالې شي، نظم خپله راځي.»
د کابل یو بل اوسېدونکی وايي: « ټرافیکي اشارې باید فعالې شي او لږترلږه د پلازمېنې بیروبار کم شي. همدارنګه هغه موټر چلوونکي باید سخت جریمه شي چې له ټرافیکي اصولو سرغړونه کوي.»
موټر چلوونکي خپله پړه پر ټرافيکو اچوي او وايي، ټرافیک پولیس د نظم خونديتوب په موخه خپل مسووليت نه ترسره کوي. خو ځيني نور بيا خپله موټرچلوونکي ګرموي او وايي، ټرافيکي اصولو ته پابند نه دي.
د کابل ښار یو تن موټر چلوونکی وايي: « ټرافیکي نښې نه شته، څراغونه خراب دي او بیروبار زښت زیات دی. حکومت باید ټرافیکي نښې ولګوي او موټر چلوونکي یې مراعات کړي، ترڅو بیروبار کم او د خلکو ستونزې هوارې شي.»
د کابل ښار یو بل موټر چلوونکی وايي: « په څلورو لارو کې ډېره ګڼه ګوڼه ده، ټرافیکي نښې نه شته او ډېر کله ټرافیک پولیس هم نه وي.»
که څه هم د کابل ښار په ځینو سیمو کې د خلکو د تګ راتګ لپاره هوايي پلونه جوړ شوي، خو خلک پر دغو پلونو نه تېرېږي بلکې د سړک په منځ کې له یوې غاړې بلې ته اوړي او په دې توګه د ټرافيکې پېښو او ګڼه ګوڼې سبب کېږي.
بل پلو، په لويو لارو کې بيا د ټرافيکي نښو کموالي هم د موټرچلوونکو شکايتونه زيات کړي او په لويو لارو کې د ډېر ټرافيکي پېښو لامل د يادو نښو نه شتوالی یا کموالی يادوي.
د کابل جلالاباد لويې لارې موټر چلوونکی وايي: « زه له حکومت غوښتنه کوم چې ټرافیکي نښې جوړې کړي، که څه هم ځینو ځایونو کې شته، خو باید په ټوله لاره فعالې شي.»
د کابل جلال اباد لویې لارې یو بل موټر چلوونکي وايي: « د لویې لارې په ځينو ځایونو کې جمپونه او موړونه اچول شوي، کله چې تېر رفتار موټر پرې راشي، نو حادثه وکړي.»
د کابل ـ کندهار لويه لاره هم ورته ستونزې لري او د خلکو په خبره، په ټوله لاره کې د ټرافیکي نښو کموالي له امله د خونړيو ټرافيکي پېښو شاهدان دي.
موږ دا ټولي ستونزې او د حل لپاره يې د خلکو وړاندیزونه د کابل ټرافیکو رياست له چارو واکو سره شریک کړل، خو تر درېيو ورځو انتظار سربېره يې هم زموږ پوښتنې ځواب نه کړې.
