د کلیو بیا رغونې او پراختیا وزارت مسوولینو د ننګرهار په ۱۷ ولسوالیو کې د ۱۴۸ میلیونه افغانیو په لګښت د اوبو ۲۷ شبکې ګټه اخیستنې ته وسپارې.
بهسود، ګوشته، دره نور، سره رود، حصارک، خوګیاڼيو، چپرهار، رودات، کوټ، بټي کوټ، اچین سپین غر، نازیان، دوربابا او مومندره هغه ولسوالۍ دي چې دا شبکې په کې ګټه اخیستنې ته وسپارل شوې.
د کلیو بیا رغونې او پراختیا وزارت د ابیارۍ رییس انجینر اسد الله عمار وايي: « په ۱۷ ولسوالیو کې تقریبا ً ۲۲ شبکې د ۱۴۸ میلیونه افغانیو په لګښت چې ۱۳ زره کورنیو ته یې د څښاک پاکې اوبه برابرې کړې دي، له ډلې څخه یې نن موږ د عمري کمپ چې دا د ۱۰۰۰ مترمکعبو په اندازه دوې زېرمې لري، ګټه اخیستنې ته سپارو.»
مسوولین زیاتوي، ننګرهار کې له کډوالۍ راستنو شویو هېوادوالو ته په ټاکل شویو ښارګوټو کې هم د څښاک پاکو اوبو شبکو د جوړولو کارونه وروستي شوي او نږدې راتلونکې کې به پرې کار پیل شي.
انجنیر اسد الله عمار په دې اړه وايي: « هغه ښارګوټي چې تقریبا ً د بهسودو، سره رود، مومندرې او روداتو ولسوالیو کې دي، بودیجه ورته پيدا شوې چې د څښاک نه شبکې او د واش پروژې نور فعالیتونه به په کې پلي شي.»
په همدې حال کې د ننګرهار د کلیو بیارغونې او پراختیا ریاست مسوولین د څښاک پاکو اوبو ته د خلکو محدود لاسرسي ته په کتو باید د اوبو پر بې ځایه او زیاتې کارونې د نیوکې ترڅنګ ټینګار کوي چې خلک باید د دغو شبکو په ساتنه کې پوره همکاري وکړي.
د ننګرهار د کلیو بیارغونې او پراختیا رییس قسمت الله مبارز وايي: « موږ تمه لرو چې دا پروژې د اوږده مهال لپاره کار وکړي. موږ له تاسو غوښتنه کوو چې هر چا ته په دې لارښوونه وکړئ چې اوبه بېځایه استعمال نه کړي او د اصراف مخه ونیسي. که موږ هر یو تر خپله وسه کار وکړو، دا وطن جوړېدای شي.»
ننګرهار کې د څښاک پاکو اوبو دا شبکې داسې مهال ګټه اخیستنې ته سپارل کېږي چې دې ولایت کې هم د اوبو سطح تر پخوا ډېره ټیته شوې او لامل یې په لوړه کچه د ژورو څاه ګانو کیندل بلل کېږي.
غوښتنې دا دي چې مسوولین دې بزګرانو ته د کروندو خړوبولو پر بدیلو لارو غور وکړي، ترڅو ځمکې لاندې پاکو اوبو منابع خوندي پاتې شي.
