ګرانډي ویلي، د ملګروملتونو د وروستیو څېړنو له مخې، اوس مهال د افغانستان اقتصاد ۸۰ سلنه فلج دی او نیمايي وګړي له لوږې سره مخ دي.
ګرانډي زیاته کړې:« درې نیم میلیونه کسان په افغانستان کې بې ځایه شوي دي، خو دا اوسنۍ شمیره نه ده، بلکې له کلونو جګړې له امله بې ځایه شوي دي. خو د اګسټ میاشتې له ۱۵مې نیټې راپدیخوا وضعیت نور هم خراب شوی او ۸۰ سلنه اقتصاد فلج شوی دی. د افغانستان نیمايي برخه نفوس له قحطۍ سره مخ دی.»
ګرانډي د بشري مرستو د رسولو او بې ځایه شویو کورنیو د بېرته ځای پر ځای کولو لپاره له اسلامي امارات سره تعامل او سیاسي مذاکرات اړین بللي او پر وینا یې له دې سره به د بشري مرستو رسولو پروسه اسانه شي.
ګرانډي زیاتوي:« زه فکر کوم،چې دا تعامل ډیر اړین دی. اوس مهال خو باید بشري مرستې ډيرې د تمرکز وړ اوسي خو اوس باید ووایم چې دا برخه هم ډیره مهمه ده او دا کولای شي مثبتې او رغنده پایلې ولري. په دې تعامل او ډيپلوماټیکو اړیکو سره به زموږ او ملګروملتونو کار هم اسانه شي.»
ګرانډي زیاته کړې:« هغه څه چې بدل شوي دي،هغه د افغانستان خلک او افغانان دي. که طالبان بدل شوي اوسي او که نه خو افغانستان د ۲۰ کلونو پخوانی افغانستان نه دی او د خلکو ذهنونه اوس ډیر بدل شوي دي. اوس طالبان هم اړ دي چې له نوي افغانستان سره د ۲۰ کلونو پخواني افغانستان په څېر چلند و نه کړي.»
د کډوالو د عالي ادارې کمیشنر زیاته کړه،چې د تېرو جګړو په څېر تر اوسه پورې زیات شمیر کسان نه دي کډوال شوي،خو د کډوالۍ بهیر ګړندی شوی،ځکه یوازې ایران ته څه باندې ۵۰۰ زره افغانان اوښتي دي.
