د ملګرو ملتونو د خوړو نړیوال پروګرام یا ( ډبلیو. ایف. پي)اندېښنه ښودلې،چې د وچکالۍ، په بیو کې لوړوالی او د تېر نظام سقوط هغه عمده لاملونه دي،چې نږدې ۲۳ میلیونه خلک یې له لوږې سره مخ کړي دي.
افغانستان کې د یاد پروګرام ویاند شیلي ټاکرل د امریکا له جمهوري راډیو سره په مرکه کې ویلي،په ۲۰۲۲ کال کې افغانانو ته لږ تر لږه د اوړو او غوړیو چمتو کولو لپاره تر ۲ اعشاریه ۶ میلیارده ډالرو ته اړتیا لري.
ټاکرل زیاته کړې:« د دې لپاره چې موږ په ۲۰۲۲ کال کې افغانانو ته خواړه ورسوو، د خوړو نړیوال پروګرام ۲ اعشاریه ۶ میلیارده ډالرو ته اړتیا لري. ډېری خلک اوس ان ترکاري نه لري او له دې سره د خوارځواکۍ کچه کې هم لا لوړوالی روان دی. د خوړو کمښت او نه شتون د نورو پرتله پر مېندوارو ښځو او ماشومانو ډېر اغیز کړی دی.»
ټاکرل ویلي،دا مني،چې افغانستان یو غریب هېواد دی او خلکو یې په سختو شرایطو کې ژوند کړی دی، خو اندېښنه یې له دې ده،چې دا ځل د غریبي دا لمن تر لویو ښارونو رارسېدلې ده.
ټاکرل زیاتوي، افغانستان کې پر واټونو ترکاري پلورل کېږي،خو د تاسف خبره دا ده،چې خلک پیسې نه لري،تر څو هغه وپیري.
