له پاکستان سره د افغانستان سوداګریزه راکړه ورکړه او ټرانزیټ، له تېرو ۱۶ ورځو راهیسې په ټپه ولاړ دي.
دې ستونزې ته په کتو، د صنعت او سوداګرۍ وزیر وايي، د افغانستان د صادراتو لپاره يې د پاکستان په ځای بدیلې لارې پیدا کړې او په دې برخه کې يي زیات تمرکز د منځنۍ اسیا پر هېوادونو دی. نور الدین عزیزي دغه اقدام د افغانستان د بزګرانو، سوداګرو او صنعتکارانو ملاتړ بولي.
د صنعت او سوداګرۍ وزیر نورالدین عزیزي وايي: « لارې تړلې دي، د افغانستان محصولات نه صادرېږي او ترڅنګ یې د پاکستان له خوا ټرانزیټ هم بند دی. موږ هڅې پیل کړې دي ترڅو داسې معقولې بدیل لارې پيدا کړو چې وکولی شو له لارې یې د افغانستان تولیدات د سیمې هېوادونو ته ولېږدوو. موږ له تېرو څلورو کالو راهیسې په دې کار کوو، خو اوس مو دا هڅې زیاتې کړې دي.»
یو شمېر افغان سوداګر بیا وایي، په وروستيو دوو اوونيو کې له پاکستان سره د سوداګرۍ درېدو له امله ورته میلیونونه ډالر زیان اوښتی او پاکستان تورنوي چې په لوی لاس په سوداګرۍ کې د ستونزو جوړولو هڅه کوي.
سوداګر عبدالجبار ساپی وايي: « تاسو پوهېږی چې پاکستان فرضي کرښه تړلې او له امله یې زموږ سوداګرو ته په لوړه کچه زیان رسېدلی؛ ځکه زموږ مېوې او ترکارۍ ټولې بندې پاتې دي، همدارنګه د ټرانزیټ مالونه هم له کرښې دواړو غاړو ته ایسار دي.»
د چارو ځينې څارونکي وایي، اسلاماباد واکمنو تل له کابل سره سیاسي کړکېچ په سوداګرۍ ور تپلی او له دې امله ډېر ځله ولسي خلکو ته په کې زیان اوړي. د دوی په خبره، نور د دې اړتیا ده چې د پاکستان پر ځای د سوداګرۍ بدیلې لارې وموندل شي.
د اقتصادي چارو شنونکی یونس ځدراڼ وايي: « پاکستان ډېر ځله له افغانستان سره داسې تړونونه کړي چې دوی به د سوداګرۍ مخنیوی نه کوي او د سیاسي مشکلاتو پرمهال به لارې نه تړي، خو بیا یې هم خپل کار تکرار کړی او پر خپله خبره نه دي درېدلي. دا زموږ او تاسو تجاراتو او حکومتونو ته چې پخوا هم ورسره ورته عمل شوی، یوه تجربه ده. زموږ حکومت باید په بدیلو لارو کار وکړي.»
د پاکستان بهرنیو چارو وزارت تېره ورځ ویلي و چې له افغانستان سره هر ډول سوداګري په ټپه ولاړه ده او دوی ته د خپلو وګړو ژوند له هر ډول سوداګرۍ ډېر ارزښت لري.
د پاکستان له لوري د لارو له تړل کېدو سره هممهاله، دواړو غاړو سوداګرو ته هره ورځ یو میلیون ډالر په مستقیم او غیرمستقیم ډول زیان اوړي.
