د اطلاعاتو او فرهنګ وزارت او د حکومت د رسنیو مرکز د رسنیو فعالیتونه وستايل.
د اطلاعاتو او فرهنګ وزارت له لوري د حکومت د اطلاعاتو او رسنیو په مرکز کې د ورستیو پیښو په اړه د رسنیو فعالیتونو د ستایلو په موخه د شمشاد راډیوتلویزیون په شمول د بېلابېلو آژانسونو، رسنیزو بنسټونو، انځوریزو او غږیزو رسنیو له مسوولینو او استازو سره غونډه ترسره شوه.
غونډه کې د اطلاعاتو او فرهنګ وزیر شیخ شیراحمد حقاني، د خپرونو چارو معین مهاجر فراهي، د حکومت د اطلاعاتو او رسنیو مرکز رییس مولوي نعیم الحق حقاني، د وزارت نشراتي برخې رییسانو او د رسنیو استازو اوخبریالانو ګډون کړی و.
په دې غونډه کې د اطلاعاتو او فرهنګ وزارت نشراتي معین مهاجر فراهي وویل، د ډیورنډ فرضي کرښې په اوږدو کې د جګړې پرمهال رسنیو د نظام له نورو برخو سره اوږه په اوږه دښمن ته مناسب ځواب ورکړ او له ملي ارزښتونو څخه یې د ساتنې مسوولیت اداء کړ.
غونډه کې د اطلاعاتو او فرهنګ وزیر په اوسني عصر کې د رسنیو پر رول خبرې وکړې او د رسنیو څخه یې د ملاتړ ژمنه تازه کړه او دغه راز یې له خبریالانو وغوښتل چې د اسلامي او ملي ارزښتونو په رڼا کې خپلو فعالیتونو ته دوام ورکړي.
د دې غونډې په لړ کې د رسنیو مسوولینو او خبریالانو هم په خپلو خبرو کې افغانستان د ټولو ګډ کور وباله او ډاډ یې څرګند کړ چې د خپل اسلامي او ملي مسوولیت له مخې خپل رسنیز فعالیت ته دوام ورکوي.
ویناوالو دغه راز د رسنیو پر وړاندې د ستونزو د حل غوښتنې او وړاندیزونه وکړل.
د اطلاعاتو او فرهنګ وزارت چارواکو او د حکومت د رسنیو مرکز مسوولینو د دغو غوښتنو او وړاندیزو په تړاو د همکارۍ او حل ډاډ ورکړ.
