په ایټالیا کې د افغانستان سفارت په یوې خبرپاڼه کې ویلي، د محمد فهیم کشاف په نوم پخوانی ډپلوماټ د سفارت ودانۍ ته د سفیر په نوم ننوتی، د سفارت کارکوونکو ته یې ویلي،چې دطالبانو له لوري سفیر ټاکل شوی او د سفارت د کار کوونکو مخته یې پر سفیر حمله وکړه،خو سفیر له ځانه د دفاع لپاره د کوربه هېواد له پولیسو مرسته وغوښته.
ایټالیا کې د افغانستان سفارت د خبرپاڼې یوه برخه:« محمد فهیم کشاف په غیری قانوني ډول د افغانستان اسلامي جمهوری سفارت ته د خپل کم عمره زوی سره داخل شو. نوموړي ویل، دی طالبانو نوی سفیر ټاکلی دی. کشاف د افغانستان اسلامي جمهوریت په سفیر حمله وکړه، د حملې مخنیوی وشو او د ایټالیا له پولیسو مرسته وغوښتل شوه، پولیسو کشاف د سفارت له ودانۍ وباسه.»
سفارت ویلي، کشاف له وړاندې د افغانستان اسلامي جمهوری نظام او ملي ارزښتونو ته د نه پاملرنې له امله له دندې ګوښه شوی دی.
ایټالیا کې د افغانستان سفارت د خبرپاڼې یوه برخه:« محمد فهیم کشاف، وړاندې د افغانستان اسلامي جمهوری نظام او ارزښتونو ته په نه پاملرنه له دندې ګوښه شوی و او د ګوښه کیدو رسمي مکتوب یې د بهرنیو چارو وزارت او د ایټالیا نړیوالو همکاریو له لورې صادر شوی دی.»
په همدې حال کې د افغانستان دبهرنیو چارو وزارت دغې شخړې ته غبرګون ښودلی، کشاف یې رسمي ډیپلوماټ یاد کړی او له سفارته د هغه په زوره اېستل یې غیر قانوني عمل بللی دی.
د بهرنیوچارو وزارت:«محمد فهیم کشاف، د ۱۳۹۹/۹/۲۸ روم- ايټالیا کې دافغانستان سفارت لومړی سکرتر ټاکل شوی،چې د ۱۴۰۲/۹/۲۸ به د افغانستان سفارت د رسمي ډیپلوماټ په توګه پیژندل کیږي. د کشاف د ګوښه کیدو په تړاو کومه پریکړه نه ده شوې. دغه راز د اسلامي امارت له لورې، د سفیر په توکه د نوموړي ګومارل کېدل هم له حقیقت لرې ده. دا چې د ښاغلي کشاف د ماموریت موده نه ده ختمه، نو د سفارت د مسوولینو له لورې یې له سفارت اېستل یو غیری قانوني او د دوی له وظیفوي صلاحیت پورته ده.»
په روم کې د افغانستان سفارت سربېره په نورو هېوادونو کې هم د افغانستان ډېری سفارتونه د واک په خلا کې واقع دي او یو شمېر یې د تېر نظام استازولي کوي او تر دې دمه یې برخلیک مالوم نه دی.
