له تیرو څلور نیمو میاشتو راهیسې ملي دفاع وزارت د وسله وال پوځ پر جوړښت کار پیل کړی او ټولې قولې اوردګانې یې فعالې کړي،چې په کې سرتېرو ته پوځي او فکري زده کړې ورکول کېږي.
د یاد وزارت ویاند عنایت الله خوارزمي وايي، د وسله وال پوځ د جوړېدو چارې ۸۰ سلنه پشپړې شوې دي او په لنډه کې موده کې به افغانان یوې مجهزه او خپلواکه اردو ولري،چې له هېواده به ساتنه کوي.
خوارزمي زیاته کړه:« د اردو جوړښت کارونه په پایته رسیدو دي او کابو اتیا سلنه چارې بشپړې شوي دي او په نږدې وخت کې د افغانستان ولس او زموږ هېواد د یوې خپلواکې منظمې او مجیهزې اردو شاهد ووسي.»
پخوانی نظامي توریالی ځاځی وايي، اسلامي امارت باید داسې پوځ جوړ کړي،چې هېواد له ځکمنۍ بشپړتیا دفاع وکړي او له ملي ځواکونو جوړ وي.
پوځي شنونکي توریالی ځاځی وايي:« طالبانو ته په کار ده،چې یوه ځواکمنه قوي ملي اردو جوړه کړي،چې وکولی شي،چې د هېواد له حدود اربعې او استقلالیت نه دفاع وکړي او دا باید په ملي ځواکونو باندې ولاړه اردو وي.»
ملي دفاع وزارت ویاند عنایت الله خوارزمي وايي، د تجهیزاتو له پلوه پر ځان بسیا دي او کولای شي،چې په شته امکاناتو د هېواد له هوايي او ځکمني حریمه دفاع وکړي.
