د فراه انار درې ولسوالۍ کې ورځ تر بلې وچکالۍ ته اندېښنې مخ پر ډېرېدو دي او له امله یې ځايي خلک نورو سیمو ته په کډه کولو اړ شوي.
کروندګر وايي، د اوبو کمښت له امله يې کروندې په شاړو ځمکو بدلې شوې او ډېر شمېر کورنۍ ښارونو ته کډه شوې دي.
د فراه اوسېدونکی فریدون وايي: « ډېرې خلکو په خپلو ځمکو کې څاه ګان وکیندل، خو هغه هم وچ شول او اوس مجبور دي چې خپلې مېنې ترک کړي. زموږ کروندې وچې او هرڅه په ډاګ بدل شول.»
د فراه اوسېدونکی عیدګل وايي: « موږ ته وچکالۍ ډېر ضررونه اړولي، هرڅه وچ شوي او د اوسېدو لپاره څه نه دي پاتې.»
د فراه اوسېدونکی میراقبال وايي: « خلکو ډېر زیان لیدلی، ونې وچې شوې، کروندې وچې دي، حتا د څښلو اوبه نه شته. امېد لرو چې راتلونکي کې بارانونه وشي او دا وچکالي هم ختمه شي.»
په ورته مهال، د فراه ځایي مسوولان هم د دې ولایت لرو پرتو ولسوالیو کې د وچکالیو له امله د اوبو کمښت ستونزه د اندېښنې وړبولي اوهیله من دي چې د بخش اباد بند رغنیزو چارو بشپړېدو سره به یاد ولایت کې د اوبو کمښت ستونزه تر یوه بریده حل شي.
د فراه والي محمد حافظ مجاهد وايي: « د فراه ولایت او ولسوالیو خلک د څښاک او کرنې اوبو له سخت کمښت سره مخ دي. دا وچکالي له تېرو څو کالو راهیسې را روانه ده.»
د فراه اناردرې ولسوالي د فراه ښار په شمال ۷۵ کیلومټرۍ کې موقعیت لري چې له پنځوس زرو څخه ډېر اوسېدونکي په کې ژوند کوي.
