د اسلام اباد ځایي پولیس وایي، هلته یې ۱۷ تنه بې اسنادو افغان کډوال نیولي او زندان ته یې لېږلي دي.
پاکستاني پولیسو ادعا کړې چې دغو افغان کډوالو د نیولو پرمهال مقاومت کاوه چې له کبله یې زندان ته ولېږل شول.
د افغان کډوالو د نیولو او ځورولو په لړ کې د کراچۍ پولیسو هم خبر ورکړی چې هلته یې نږدې ۱۲۰۰ هغه کورونه ویجاړ کړي چې افغان کډوال په کې مېشت وو.
د پاکستان ډان ورځپاڼې د خپلو سرچینو په حواله راپور کې ویلي، د افغان کډوالو د نيولو پر وړاندې د دې هېواد پولیسو جدي اقدامات پیل کړي دي.
د ډان ورځپاڼې په راپور کې راغلي: « له تېرو پنځو ورځو راهیسې په کراچۍ کې د افغان کډوالو څه باندې ۱۲سوه کورونه ویجاړ شوي او هڅه مو کړې چې په دې کورونو کې مېشت کډوال خپل هېواد ته ستانه کړو. د دې کورونو له ویجاړېدو سره څه باندې ۱۴زره افغان کډوالو اړ شوي چې پاکستان پرېږدي او خپل هېواد ته لاړ شي.»
له دې سره هم مهاله، اسلامي امارت خبر ورکړی چې د یک شنبې په ورځ له ایران او پاکستان نه تر۹۰۰ ډېرې کورنۍ افغانستان ته را ستنې شوې دي.
د حکومتي چارواکو د معلوماتو له مخې، تېره ورځ له ایران او پاکستانه ۹۴۲ کډوالې کورنۍ افغانستان ته ستنې شوې دي چې له ډلې یې د نيمروز د ورېښمو پله له لارې ۶۹، د هرات د اسلام کلا له لارې ۳۸، د سپين بولدک له لارې ۸۲۱ او د هلمند بهرامچې له لارې ۱۴ کورنۍ هېواد ته راغلې دي.
د چارو څارونکي بیا وایي، پاکستان هېڅکله د افغانستان پر وړاندې خپل دریځ نه بدلوي او خپلو ناسمو سیاستونو ته ادامه ورکوي.
د پوهنتون استاد فیض محمد ځلاند وايي: « پاکستان فکر کوي چې با ثباته افغانستان د دوی په تاوان دی. دوی غواړي افغانستان د خپلې سټراټیژيکې ژورتیا په توګه وساتي. ښه به دا وي چې ټول افغانان د پاکستان پر وړاندې د یوه ملي او سیاسي تعهد له مخې ودرېږي او اجازه ورنه کړي چې پاکستان زموږ سیاسي خپلواکي او حاکمیت تر پوښتنې لاندې راولي.»
د چارو یو شمېر نور څارونکي بیا وایي، پاکستان د خپلو سیاسي ګټو په تکل کې لا هڅه کوي چې د افغان کډوالو پر وړاندې ستونزې جوړې کړي.
د سیاسي چارو شنونکی خلیل احمد نادم وايي: « پاکستان تل د مهاجرو مسئله د افغانستان په مقابل کې د حربې په توګه کاروي. ایران هم همدا کار کوي مګر پاکستان په دې وروستیو کې له ډېر جبر څخه کار اخیستی او په کراچۍ کې یې د مهاجرو هغه کورونه نړولي چې دوی په خپلو پیسو اخیستي وو.»
د یادولو وړ ده چې تېره اوونۍ هم یو شمېر پاکستاني رسنیو د خپل هېواد د چارواکو له خولې خبر ورکړی و چې د افغان کډوالو پر وړاندې یې د حکومت دریځ پخوانی دی او نه غواړي چې نور دلته افغان کډوال پاتې شي.
