تېره اوونۍ په کراچۍ او بلوچستان کې د داعش خراسان ډلې د مهو غړو له وژل کېدو وروسته تازه د افغانستان سولې لپاره د امريکا پخواني ځانګړي استازي زلمي خليلزاد د پاکستان حکومت د نيابتي ډلو په روزنه او ملاتړ تورن کړی.
خلیلزاد ويلي، پاکستان د اسلامي امارت او بلوڅ ازادي غوښتونکو پر وړاندې له داعش ډلې ملاتړ کوي.
هغه زیاته کړې:« پاکستان په بي پروایۍ سره د افغانستان او د دوی د خپل بلوڅ ازادي غوښتونکي غورځنګ پر ضد له داعش ملاتړ کوي.»
خلیلزاد له دې وړاندې هم د ترهګریزو ډلو د ملاتړ په برخه کې د پاکستان ځينې تګلارې غندلې وې او له امریکا يې غوښتي وو چې د سيمې او نړۍ امنيت د تامين لپاره دې په دې هېواد کې د وسله والو نيابتي ډلو پر وړاندې اقدامات وکړي.
د سیاسي چارو شنونکي بیا وايي، پاکستان له لسېزو راهيسې د خپلو ګټو خونديتوب لپاره ان له ترهګرۍ هم ملاتړ کوي او په نورو هېوادونو کې يې د خپلو اهدافو لپاره کاروي.
د سیاسي چارو شنونکی عزیز معارج وايي:« دا چې پاکستاني چارواکي له داعش ملاتړ کوي، د زلمي خلیلزاد خبره یا ادعا رېښتیا ده، ځکه هلته د داعش مشران په کراچۍ، بلوچستان، پاړه چنار او نورو سیمو کې نیول شوې او وژل شوې دي. دا کره شواهد ښيي چې هلته داعشیان شته دي او دوی یې ملاتړ کوي. نو بناء په فعلي حالت کې د اسلامي امارت چارواکي چې نړیوالو ستېجونو او ناستو ته ځي، دا خبره باید واضح کړي، هغه تورونه چې پر افغانستان لګول کېږي چې دلته ترهګر دي او ځالې یې دي، دوی ته دې د کره شواهد پر اساس قناعت ورکړي، ترڅو د پاکستان ادعا او نورو هېوادونو هم رفع شي او د سولې او امنیت ډاډ، همدا راز د نشه يي توکو د ورکېدو قناعت باید مقابل لوري یا نړیوالو ته ورکړل شي. »
د سیاسي چارو شنونکی واحد فقیري وايي:« د خلیلزاد او پاکستان ترمنځ د تورونو لړۍ زیاته شوې، یو پر بل باندې تورونه تړي. د خلیلزاد دا خبره چې پاکستان د داعش ملاتړ کوي او ورته پټنځایونه یې ورکړې دي، دا هم جدي تور دی، زه فکر کوم چې پاکستان به د دې په اړه یو نظر وړاندې کړي.»
د روان ۲۰۲۵ کال د جنورۍ پر ۲۲ مه نېټه د اسلامي امارت د امنيتي او تصفيوي مرکزي کمېسیون په کلني راپور کې د موثقو اسنادو په بنا ويلي وو چې پاکستان په بلوچستان کې د داعش وسله والو لپاره خوندي مرکزونه جوړ کړي او د کراچۍ او اسلام اباد له هوايي ډګرونو تر دغه مرکزونو مهم غړي رسول کيږي.
