Skip to content
د بلخ امنيتي مسوولین ډاډ ورکوي،چې په دغه ولايت کې د جنايي پېښو کچه صفر ته نږدې شوې ده.
د یاد ولایت امنیه قوماندانۍ امنیت آمر عبدالحی عابد وايي، په تېرو درې اونيو کې لسګونه مجرمين نيول شوي او عدلي ارګانونو ته سپارل شوي دي.
عابد زیاته کړه:« د فتحې په اوايلو کې د جرايمو کچه لوړه وه؛ خو د خدای په فضل او د مجاهدينو په هڅو د جرمونو کچه ډېره ټيټه شوې ده. موږ خلکو ته وعده ورکوو، چې تر راتلونکو څو اونيو پورې به د جرايمو کچه صفر ته ورسوو.»
بلخ ولایت اوسېدونکي هم وايي، د اسلامي امارت د سيمه ييزو امنيتي مسوولينو د هڅو له امله په مزارشريف ښار کې د جنايي جرايمو پېښې کمې شوي دي.
رازمحمد په مزارشريف ښار کې د خوراکي توکو هټۍ وايي، پخوا به له خپلې هټۍ تر کوره پورې د تګ پر مهال په لاره کې د غلو له وېرې له ګڼو اندېښنو سره مخ وو.
راز محمد وايي، اوس مهال يې ۹۰ سلنه وېره او اندېښنه کمه شوې او د شپې او ورځې په ډاډه زړه ښار کې تګ راتګ کولی شي.
هغه وايي:« د څو مياشتو مخکې کيسه درته وکړم،چې مازیګر به شو،ؤنو د غلو له وېرې به مو هټۍ بنده کړه، بيا به تر کوره رسېدو پورې پر لاره ويرېدو،چې هسې نه څوک رانه پيسې يا موبايل واخلي، خو اوس ډېری وخت د ماښام لمونځ په هټۍ کې کوم او د شپې له خوا کور ته روانېږو،هېڅ وېره نه شته دی او د غلو مخه نيول شوې ده. غوښتنه مو دا ده،چې په همدې ډول امنيت ټينګ وساتل شي.»
د بلخ اوسېدونکي هم د خوښۍ په څرګندولو وايي، په مزارشریف ښار کې د تښتونو، وژنو او غلاوو پېښې کمې شوي دي.
دوی وايي، حکومت بايد نور هم په دې برخه کې هڅې وکړي،ترڅو خلکو ته بشپړه ډاډمنه فضاء رامنځته شي.
د مزارشریف اوسېدونکی غلام رسول وايي:«له نېکه مرغه په تېرو شااوخوا دوه مياشتو کې په مزار شریف ښار کې موږ د اختطاف کومه پېښه نه ده اورېدلې، جرمونه هم کم شوي دي، د غلاوو ځينې وړې پښې اوس هم شته دی. اندېښه په کامله توګه نه ده رفع شوې؛ خو د پخوا په څېر نه ده.»
د مزار شریف ښار یو بل اوسېدونکی رستم بیا وايي:« موږ له اوسني حکومته ډېر خوشاله او راضي يو، جنګ او نا امني نشته؛خو يوه غوښتنه لرو،چې خلکو ته دې کار پيدا کړي او همدا راز دې د توکو بیې ټېټې کړي.»
د مزارشريف ښار اوسېدونکي که څه هم له شته امنيتي وضعيته خوشاله دي؛خو تر څنګ يې غوښتنه کوي،چې حکومت بايد خلکو ته کاري فرصتونه رامنځته کړي.
