د چاپیریال په ساتنه کې د رسنیو رول تر سرلیک لاندې علمي سیمینار د چاپېریال ساتنې ملي ادارې او یوه خصوصي پوهنتون په نوښت جوړ شو.
په دې سیمینار کې د رسنیو پر استازو سربېره د چاپیریال ساتنې ملي ادارې چارواکو او د پوهنتون استادانو هم ګډون درلود او د سالم چاپېريال د رامنځته کولو پر لارو چارو او ارزښت يې بحثونه وکړل.
د چاپیریال ساتنې ملي ادارې چارواکي د سالم چاپیریال رامنځته کولو په برخه کې د رسنیو رول مهم یادوي او زیاتوي چې رسنۍ کولی شي په اسانۍ سره په دې برخه کې خلکو ته عامه پوهاوی ورکړي.
د چاپېریال ساتنې ملي ادارې رییس مطیعالحق خالص وايي: « حقیقت دا دی چې رسنۍ په هر ډول ټولنو کې د خلکو سترګې او ژبه دي. رسنۍ باید خپله دغه رسالت ته ډېره توجه وکړي او مثبته ګټه ترې پورته کړي. رسنۍ د چاپېریال ساتنې په برخه کې د عامه پوهاوي په تړاو مثبت رول لري.»
د پوهنتون استادانو او د رسنیو ځینو استازو هم خبرې وکړې او ویې ویل، رسنۍ کولی شي په دې برخه کې مهم رول ولري او دا یوازې په هغه صورت کې ممکن دی چې امکانات په واک کې ورکړل شي.
د دوی په وینا، رسنۍ د چاپیریال ساتنې د فرهنګ عامولو په برخه کې تر ټولو ښه لار ده چې کولی شي خلکو ته په اسانه توګه د سالم چاپېریال د ارزښت په اړه معلومات ورکړي او خلک د خپل چاپېریال ساتنې ته وهڅوي.
د پوهنتون استاد محمد حنیف فرزان وايي: « د خلکو د پیاوړي کولو له پلوه، رسنۍ کولی شي د نورو ټولنو د بریالیو روزنیزو پروګرامونو او بېلګو په وړاندې کولو سره، د خپلو خلکو د پوهاوي کچه لوړه کړي.»
د یوه خصوصي ټلویزیون رییس سنګر هاشمي وايي: « په داسې یوه زمانه کې چې د اطلاعاتو د انفجار او ټکنالوژۍ عصر دی، له یوې خوا چاپېریال او طبیعت زیانمن شوی او له بلې خوا د چاپېریال ساتنې په اړه خلکو ته اطلاع رسونه، د چاپېریال ساتنې څرنګوالی او لارې چارې، د رسنیو لومړنی رسالت دی.»
چارواکي بیا ټینګار کوي چې د چاپېریال ساتنې په برخه کې خلک باید له حکومت سره له نږدې همکار پاتې شي او حکومتونه په یوازې ځان نه شي کولی سالم چاپېریال رامنځته کړي.
د چاپېریال ساتنې ملي ادارې رییس مطیعالحق خالص په دې اړه وايي: « تر هغو چې ملت او نظام سره یو لاس نه شي، د چاپېریال ساتنه امکان نه لري. دا زموږ ټولو ګډ مسوولیت، امانت او مبرم ضرورت دی.»
په دې سیمینار کې غوښتنه وشوه چې رسنۍ باید د خپلو خبري سرویسونو، ګردیو مېزونو، خپرونو او همدا راز د تمثیلي ټوټو او لنډو سریالونو خپرولو له لارې د چاپېریال د ارزښت او ساتنې په تړاو معلومات ورکړي.
