د افغانستان لپاره د هالنډ کمېټې مسوولان وایي، د هېواد په ۱۶ ولایتونو کې یې د کروندګرو او مالدارانو د ملاتړ په موخه بېلابېل خدمات برابر کړي دي.
د دې کمېټې د مسوولینو په خبره، یادو خدماتو کې د حیواني کلینیکونو جوړول، د شیدو راټولولو او پروسېس مرکزونه او همدارنګه د کورنیو د اقتصادي پیاوړتیا لپاره د چرګانو کوچني فارمونه شامل دي.
لوېدیځ زون کې د هالنډ کمېټې مشر محمد حامد شمس وايي: « د دې پروژې ډونر اروپايي ټولنه ده. دا پروژه د ۲۰۲۲ کال په پای کې پيل شوه او د ۲۰۲۵ کال تر پایه به بشپړه شي. په دې پروژه کې د افغانستان ۱۶ ولایتونه تر پوښښ لاندې نیول شوي او په لوېدیځ زون کې هرات، غور، بادغیس او نیمروز ولایتونه په کې شامل دي.»
یو شمېر مالداران او کروندګر بیا د هالنډ کمېټې له مرستو خوښي څرګندوي او وایي، د دې بنسټ د روزنیزو پروګرامونو او امکاناتو په مرسته یې د مالدارۍ او کرنې کاروبار وده کړې او د تولیداتو کچه یې لوړه شوې ده.
مالدار احمد جاوېد وايي: « هالنډ کمېټه له تېر یوه کال راهیسې د شیدو راټولولو او پروسېس په برخه کې له ما سره همکاري کوي. موږ ته یې د شیدو راټولولو، ټېست او پروسېس وسایل راکړي. دغې مرستې زما پر کاروبار مثبت اغېز کړی او کولی شم ډېرې او با کیفیته شیدې راټولې کړم.»
مالدار عبدالرحمن وايي: « له دې وړاندې په مالدارۍ ښه نه پوهېدم، کله به چې څاروي ناروغ شول، رانه مړه کېدل؛ خو اوس مې هم مالونه لږ تلفات ورکوي، هم مې محصولات زیات شوي او هم ګټه.»
له بلې خوا، د هرات د کرنیزو او مالدارۍ محصولاتو خونې مسوولان ټینګار کوي چې په هېواد کې دننه او بهر مرستندویه بنسټونه دې خپلې مرستې د اړوندو ادارو په همغږۍ ووېشي، ترڅو دا مرستې په واقعي ډول اړمنو کسانو ته ورسېږي.
د هرات د کرنیزو او مالدارۍ محصولاتو خونې رییس بشیر احمد بهادري وايي: « موږ د کرنې په برخه کې فعالیت کوو او تمه لرو چې هغوی موږ سره همغږي ولري؛ ترڅو واقعا ً اړمن کسان او هغوی چې مالداري لري، له دغو مرستو برخمن شي.»
د افغانستان لپاره هالنډ کمېټه هر کال په هرات، فراه، غور، بادغیس او نیمروز ولایتونو کې د حیواني روغتیایي خدمتونو ترڅنګ، بزګرانو او مالدارانو ته د عصري کرنې او مالدارۍ په برخه کې روزنیز کورسونه هم جوړوي.
