د اروپايي ټولنې پارلمان د یوې خبرپاڼې په خپرولو سره وايي، د روان کال د اکټوبر په اوومه نېټه د اروپا پارلمان استازي یوه غونډه ترسره کوي چې موخه یې د افغان ښځو او په افغانستان کې د وروستۍ زلزلې له امله زیانمنو شویو کسانو د ملاتړ څرنګوالی دی.
د اروپا پارلمان د اسلامي امارت له لوري د ښځو پر وړاندې د محدودیتونو پر وضع کولو نیوکه کړې او ادعا یې کړې چې د اوسني حکومت له لوري یو لړ کړنې د حکومت په رسمیت نه پېژندل کېدو او په افغانستان کې د نړیوالو د مالي مرستو کمېدو لامل ګرځېدلي.
د اروپا پارلمان د خبرپاڼې یوه برخه کې راغلي: « طالبان چې اوس مهال په افغانستان کې واکمن دي او یوازې د روسیې له لوري په رسمیت پېژندل شوي، د نړیوالو بېړنیو مرستو غوښتنه کوي، خو د طالبانو سختې پرېکړې، په ځانګړي ډول د ښځو پر وړاندې محدودیتونه لامل شوي چې د څلورو کلونو واکمنۍ وروسته هم له پراخې نړیوالې رسمیت پېژندنې بې برخې شي. دغه تګلارې د نړیوالو مالي مرستو د څرګند کموالي سبب شوې دي او د افغانستان بشري وضعیت یې نور هم کړکېچن کړی.»
همداراز، د اروپايي پارلمان په خبرپاڼه کې یادونه شوې چې د دې موضوع په اړه به یو پرېکړه لیک د روان کال د اکټوبر په نهمه، دوه ورځې له ناستې وروسته رایه ورکونې ته وړاندې شي.
په همدې مهال، د بحران نړیوالې ډلې په یوه راپور کې ادعا کړې چې د امریکا او د افغانستان د لویو نړیوالو تمویلوونکو د مالي مرستو کمښت به افغانستان تر پخوا ډېر بېوزلۍ ته ټېل وهي او دا به ښځې او نجونې تر ټولو زیاتې اغېزمنې کړي.
د بحران نړیوالې ډلې د راپور یوه برخه کې راغلي: « امریکا او نور ستر تمویل کوونکي له افغانستان سره مالي مرستې راکموي. د بودیجې سخت کمښت د طالبانو پر اوږو او د هېواد پر اقتصاد لا ډېر مسوولیت ور اچوي، خو اوسنی حکومت د پراخ فقر پر وړاندې ناتوانه دی. د دې حالت تر ټولو سختې پایلې بر پر زیانګارو ډلو او په ځانګړې توګه ښځو او نجونو ناوړه اغېز ولري.»
له دې سره، د اقتصادي چارو کارپوهان د اوسني حکومت اقتصادي لاسته راوړنو ته په اشارې له اروپايي اتحادیې غواړي چې د یوې منظمې اقتصادي کړنلارې پر بنسټ عمل وکړي.
د اقتصادي چارو شنونکی سید مسعود وايي: « زه فکر کوم اروپايي ټولنه د یوې داسې لارې له مخې چې په جمعي توګه حرکت کوي، د هغو موادو غوښتنه کوي چې په اړه یې توافق شوی یا منل شوي دي. دوی غواړي د افغانستان د اوسنیو وا کمنانو پر وړاندې متحده او یوه مخیزه لاره تعقیب کړي.»
د یادولو وړ ده چې د اسلامي امارت چارواکو تر اوسه د اروپايي پارلمان او د بحران نړیوالې ډلې د څرګندونو په اړه څه نه دي ویلي، خو له دې وړاندې یې دا ډول څرګندونې رد کړې او وايي، د ښځو او نجونو حقونه خوندي دي او د هېواد پر اقتصادي پرمختګ کار کېږي.
