د برېښنا پرچاوۍ له امله د شکايتونو په دوام دا ځل هم د کابل اوسېدونکي ورته شکايت لري. دوی وايي، د برېښنا د تېرې او اوسنۍ پرچاوۍ توپیر په ځينو سيمو کې دا دی چې اوس په ۲۴ ساعتونو کې يوازې ۴ ساعته برېښنا لري.
د کابل اوسېدونکی محمد سلیم وايي: « موږ په څلورېشت ساعتونو کې یوازې ۴ ساعته برېښنا لرو، حال دا چې زموږ ټول کاروبار په برېښنا پورې اړه لري. زموږ هیله دا ده چې د پرچاوۍ کچه راټیټه شي، ترڅو خپل کاروبار ته رسېدنه وکولی شو.»
د کابل ښاریان دغه راز وایي، ټول کارونه یې په برېښنا پورې تړلي. دوی له برېښنا شرکت غواړي چې د پرچاوۍ د مخینوي لپاره جدي هڅې وکړي.
د کابل اوسېدونکی سباوون وايي: « زه محصل یم او تر ټولو ډېره اړتیا مې برېښنا او انټرنېټ ته ده، که دا دوه څیزونه موږ ته موجود وي، کولی شو هم خپل درسونه ووایو او هم نورو چارو ته رسېدنه وکړو.»
د برېښنا شرکت مسوولان هم په هېواد د برېښنا کمښت مني خو ډاډ ورکوي چې د پرچاوۍ مخنیوي لپاره لاس په کار شوي او د ژمې له را رسېدو وړاندې به په کابل کې د برېښنا کمښت ستونزه حل شي.
د برېښنا شرکت ویاند محمد صادق حق پرست وايي: « د کابل اساسي کمښت د برېښنا له درکه دی. د برېښنا په برخه کې د کابل ښار اړتیا له ۶۵۰ تر ۷۵۰ مېګاواټو پورې ده، خو موږ له ۳۵۰ تر ۴۰۰ مېګاواټو پورې برېښنا لرو. د برېښنا شرکت مشرتابه په دې اړه جدي کار کوي، تاسو ولیدل چې د پانګونې جذب کنفرانس کې د ۲۲ هېوادونو مېلمانه راغلي وو او تقریبا ً تر ۴۵۰ مېګاواټو پورې د برېښنا د تولید نوي تړونونه وشول او تر ۸ زره ۸۰۰ مېګاواټو برېښنا د تولید تفاهم لیکونه لاسلیک شول. د دغو پروژو په بشپړېدو سره به د کابل او ټول هېواد ستونزې حل شي.»
که څه هم په افغانستان کې له کلونو راهیسې خلک د برېښنا د پرچاوۍ په تړاو شکایتونه کوي، خو په ځواب کې یې بیا حکومتي چارواکي په پرله پسې توګه ژمنې کوي چې دا ستونزه به ژر تر ژره حل شي.
افغانستان د خپلې اړتیا وړ نږدې۸۰ سلنه برېښنا له نورو هېوادونو واردوي چې ډېر ځله په صادروونکو هېوادونو کې د برېښنا کمښت هم د افغانستان پر برېښنا منفي سیوری غوړوي.
