د محمد ابراهیم په مشرۍ د پاکستان د جماعت اسلامي ګوند یو پلاوی کابل ته راغلی او دلته یې د دواړو هېوادونو پر اړیکو له حکومتي چارواکو سره خبرې کړې.
د بهرنیوچارو وزیرامیرخان متقي له پاکستاني پلاوي سره په لیدنه کې د افغانستان او پاکستان ترمنځ د پلاویو تګ راتګ مهم بللی او د کابل او اسلام اباد ترمنځ یې مثبتې اړیکې د دواړو هېوادونو د ولسونو لپاره ګټورې یادې کړې دي.
د بهرنیو چارو وزیر امیرخان متقي په دې لیدنه کې ویلي: « د افغانستان او پاکستان ترمنځ په ګڼو کچو د پلاویو تګ راتګ مهم دی او د دواړو هېوادونو ترمنځ مثبتې اړیکې د ولسونو په ګټه دي.»
په همدې حال کې د پاکستان د جماعت اسلامي ګوند پلاوي د افغانستان او پاکستان د ولسونو ترمنځ پر نږدېوالي ټینګار کړی او د کابل – اسلام اباد ترمنځ یې اړیکو کې ښه والی له ډیورنډ فرضي کرښې هاخوا ولسونو د ژوند د ښه کېدو لپاره مهم بللی.
د پاکستان جماعت اسلامي ګوند د پلاوي مشر محمد ابراهیم ویلي: « د افغانستان او پاکستان ولسونه باید سره نږدې شي، په افغانستان کې وروستي راغلي پرمختګونه د ستایلو دي. د دواړو هېوادونو ترمنځ په اړیکو کې ښه والی د کرښې پورې غاړې ولسونو د ژوند له ښه والي سره مرسته کوي. هیله لرو پر شته ستونزو لاس بري شو.»
د بهرنیو چارو وزیر د افغان کډوالو کوربتوب په برخه کې د پاکستان د جماعت اسلامي ګوند خدمتونه د ستاینې وړ بللي او زیاته کړې یې ده چې په پاکستان کې د دیني او سیاسي ګوندونو رول د پام وړ او مهم دی.
د بهرنیوچارو وزارت د ویاند مرستیال ضیا احمد تکل وایي: « محترم متقي صاحب په پاکستان کې د جماعت اسلامي اجتماعي خدمات د ستاینې وړ وبلل او له څو لسیزو راهیسې یې د افغان مهاجرینو کوربه توب له امله مننه وکړه او د پاکستان د دیني ګوندونو رول یې د پام وړ وباله.»
تحلیلوونکي بیا د داسې پلاویو تګ راتګ د دواړو هېوادونو ترمنځ د اړیکو د ټینګښت په برخه کې ګټور نه یادوي او زیاتوي چې د پاکستان سیاسي ګوندونه او خلک دې خپل حکومت ته مشوره ورکړي چې د ټولو ګاونډیانو په تېره بیا د افغانستان پر وړاندې په خپلو پالیسو کې بدلون راولي.
د سیاسي چارو شنونکی ادریس محمدي ځاځی وايي: « دا کتل او لیدل باید د پاکستان خلک په خپل منځ کې سره وکړي. د پاکستان ولس د خپل حکومت او چارواکو ته قناعت ورکړي، ترڅو راتلونکي کې د افغانستان له حکومت، چارواکو او ولس سره ضد او نقیض خبرې او ګواښ ونه کړي. همدارنګه د سیاستونو د تخریب، اقتصاد په ټپه درولو، سوداګریزو دروازو بندولو او پر افغانستان د شپې له خوا بریدونو هڅه ونه کړي. یانې دا چې پاکستان اوس مهال په خپلو ټولو اقتصادي او سیاسي اړیکو او پلانونو کې تغییرات راولي.»
دا په داسې حال کې ده چې څه موده وړاندې د پاکستان لومړي وزیر مرستیال او بهرنیو چارو وزیر محمد اسحاق دار په مشرۍ د پاکستان حکومت لوړ پوړی پلاوی کابل ته راغلی وو او دلته یې له افغان چاوراکو سره د کابل او اسلام اباد ترمنځ د سیاسي اړیکو په ټینګښت او په سوداګریزو برخو کې د اسانتیاو برابرولو خبرې درلودې، خو لایې کومه مثبته پایله نه ده لیدل شوې.
