د ٬٬رښتني ژورنالېزم، باخبر ولس او سالمه ټولنې،، تر سرلیک لاندې جوړې شوې ناستې پرمهال په ټولنه کې د رسنیو پر ارزښت، مسوولیتونو او د خبریالانو پر ستونزو او ننګونو بحث وشو.
په دې ناسته کې د اطلاعاتو او کلتور وزارت مسوولین د رښتني ژورنالېزم ساتل د رسنیو او خبریالانو ګډ مسوولیت ګڼي او په دې برخه کې پر اصولو ولاړ د پېښو د انعکاس غوښتنه کوي.
د اطلاعاتو او کلتور وزارت د مطبوعاتو او پر رسنیو د څار رییس صفيالله رائد وايي: « ریښتینی ژورنالېزم یوازې یوه دنده نه بلکې یو رسالت دی. که دا رسالت په ریښتیا، اخلاص او مسلکي معیارونو پرمخ یوړل شي، نو زموږ ولس به باخبره، ټولنه به سالمه او راتلونکی به روښانه وي.»
د چارو ادارې رییس بیا وايي، رسنۍ د ټولنو په یووالي، د هېواد په پرمختګ او د ټولنې د اړتیاوو په پوره کولو کې رغنده رول لوبوي. د هغه په خبره، حکومت د بیان ازادۍ او رسنیو ته د ارزښت په سترګه ګوري.
نورالحق انور د رسنیو پر اصولي کېدو د ټینګار ترڅنګ، د ټولنې د فزیکي او رواني امنیت د خوندیتوب لپاره له خبریالانو غواړي چې د شایعاتو له خپراوي ډډه وکړي.
د چارو ادارې رییس نورالحق انور وايي: « ریښتینی ژورنالېزم د ټولنې ضرورت دی، له دې سره چې کومه اصلاح راتلی شي، بل څه سره نه شي راتلی. که څوک غواړي چې دلته وحدت رامنځته شي، د خلکو ترمنځ مینه، محبت او باور پيدا شي، نو ژورنالېزم باید اصولي شي.»
بل پلو، د اطلاعاتو او کلتور وزارت د رسنیو او په تېره بیا د خبریالانو ستونزې مني او تر خپلې وسې د رسنیو د ملاتړ او همکارۍ ډاډ ورکوي.
د کورنیو چارو وزارت هم د واقعیتونو او پېښو د انعکاس په وخت کې د خبریالانو د ملاتړ او د هغوی د فزیکي امنیت د ټنګښت خبره کوي.
د اطلاعاتو او کلتور وزارت د فرهنګ او هنر معین عتیقالله عزیزي وايي: « سره له دې چې اسلامي امارت او په ځانګړې توګه د اطلاعاتو او کلتور وزارت ښايي ستاسو لکه څرنګه چې اتیا ده خدمت نه وي کړی، خو خپل ظروف او شرایط یې له تاسو نه دي درېغ کړي. موږ بیا هم ستاسو خدمت کې یو.»
د کورنیو چارو وزارت ویاند عبدالمتین قانع وايي: « سمه ده چې ځینې مشکلات مخ ته راځي، د حقایقو د انعکاس لپاره د اسلامي ارزښتونو په چوکاټ کې انتقادونه هم وکړئ، مګر واقعیتونه باید بیان کړئ، لکه څرنګه مو چې بیان کړي دي او موږ له دې امله مننه کوو.»
په دې ناسته کې د ملي او ولسي ارزښتونو او نزاکتونو په پام کې نیولو او د بیان د مناسب طرز پر مراعتولو هم خبرې وشوې.
