د ننګرهار وادي کرنیز دولتي شرکت اړوند د خرما بڼ چې اوسمهال په کې د حاصلاتو را ټولولو پروسه پیل شوې، د لومړي ځل لپاره یې حاصلات له ننګرهار پرته د هېواد نورو ولایتونو ته هم د خرڅلاو په موخه ولېږدول شول.
د یاد بڼ قراردادي وايي، د خرما کیفیت او حاصلاتو زیاتېدو سره اوس پېرودونکي هم زیات شوي دي.
د خرما بڼ قراردادي حبیب الله زیاتوي: « نورو کلونو کې به یوازې په جلال اباد ښار کې خرڅېدې، خو سږ کال د افغانستان له ټولو ولایتونو څخه مشتریان راځي، خرما اخلي او موږ هم د رسولو خدمات وړاندې کوو.»
د کرنې د برخې کار پوهان بیا وایي، خرما په ننګرهار او د افغانستان په ګرمو سیمو کې ښه حاصل ورکوي. د دوی په خبره، باید په دې برخه کې د نورو هېوادونو له احتیاجه د خلاصېدو په موخه ډېر باغونه جوړ شي.
د کرنې برخې کار پوه محمد نظر وايي: « دولت باید د خرما باغونو تکثیر ته لا ډېره زمینه برابره کړي، ترڅو هېواد د خرما له واردوونکي څخه صادروونکي هېواد ته لاړ شي. همدارنګه په خپله هېواد کې با کیفیته خرما ولرو او خلکو ته یې ورکړو.»
بله خوا، د فارم هډې خرما بڼ مسوولین وایي، ورځ تر بلې د خرما اړتیا او د حاصلاتو زیاتېدو ته په کتو، د خرما بڼونو د پراختیا لپاره هم هڅې زیاتې شوې دي.
د دوی په خبره، ننګرهار کې د خرما ٦ زره بوټي تر روزنې لاندې نیول شوي او د هېواد په ځنیو ولایتونو کې هم د خرما نوي باغونه جوړ شوي دي.
د فارم هډې خرما بڼ مسوول عبد القیوم اطرافي وايي: « د خرما لومړني باغونه په ۴۰ جرېبه ځمکو جوړ وو، خو اوس دا کچه ۷۵ جرېبو ته رسېدلې. موږ له ۶ تر ۹ زرو پورې بوټي تر روزنې لاندې نیولي چې کندهار، هلمند او نورو ګرمسېرو ولایتونو ته به ولېږدول شي. د خرما نیالګیو ته تقاضا ډېره ده او موږ هڅه کوو د تکثیر لپاره یې لا ډېر ګامونه پورته کړو.»
د فارم هډې خرما بڼ د مسوولینو د معلوماتو له مخې، ټاکل شوې سږ کال له دې بڼ څخه ٢٢ ټنه خرما راټوله شي.
