پکتیا کې د ١٩٦ میلیونه افغانيو په لګښت د ۱۸ ښوونځیو لپاره نوې جوړې شوې ودانۍ ګټه اخستنې ته وسپارل شوې. مسوولین وایي، دا ودانۍ د مرکز ګردېز په ګډون د دې ولایت په بېلابېلو ولسوالیو کې جوړې شوې دي.
په همدې موخه جوړو شویو مراسمو ته د پوهنې وزیر یوځل بیا د افغانانو لپاره د عصري علومو پر اهمیت ټینګار کړی.
د پوهنې وزیر حبيب الله اغا وايي: « لکه زما او ستا بدن چې غذا ته څومره ضرورت لري، دینې علوم زما او ستا د بدن روحاني غذا ده او عصري علوم زما او ستا د بدن مادي غذا ده. د انسان بدن دغو دواړو غذاګانو ته اړتیا لري.»
د يادو ودانيو د پرانيستې مراسمو کې د پکتيا ځایي مسوولان وایي، پر يادو ودانيو شاوخوا ۱۹۶ ميليونه افغانی لګښت راغلی چې چارې يې د جاپان هېواد د خلکو په مالي مرسته او د يونيسف ادارې په مشارکت ترسره شوې او په تېرو نهو مياشتو کې بشپړې شوې دي.
د پکتيا پوهنې ریيس عبدالقيوم فاروقي وايي: « په دغو ودانیو د ۱۹۶ میلیونه افغانیو په ارزښت لګښت راغلی او دا لګښت به د زده کوونکو، ښوونکو او ولس په خدمت کې وي. موږ به دغه شان خدمتونو ته ادامه ورکوو.»
د پکتيا اقتصاد رییس محمد انور راشد وايي: « زموږ ۶۰ سلنه نور ښوونځي هم ودانۍ نه لري او باید نوره مرسته هم وشي، ترڅو د پکتیا ولایت زده کوونکي له ستونزو وژغورل شي.»
اخوا د دې ولایت اوسېدونکي او د ښوونځیو زده کوونکي وایي، د دغو ودانیو په جوړېدو سره به زرګونه زده کوونکو ته د زده کړو مناسب چاپېریال برابر شي او په یاده برخه کې به د سیمې یوه مهمه اړتیا پوره شي.
دوی همدا راز له مرکزي حکومت په دې تړاو د لا نورې همکارۍ غوښتنه کوي.
د پکتیا اوسیدونکی فضل امین وايي: « په داسې حال کې چې ماشومان هم شته، قلمونه، ودانۍ او ښوونکي هم شته، خو ښوونه روزنه پرمخ نه ځي، دا ولې؟ دا دېته اړتیا لري چې ښوونکي او د پوهنې وزارت کارکوونکي لا ډېر کار وکړي.»
زده کوونکي بیت الله وايي: « موږ ډېر خوښ یو چې د ښوونځي لپاره مو ودانۍ جوړه شوه. له دې وړاندې موږ تر شنه اسمان لاندې وو، بادونه، بارانونه او نورې ستونزې مو لرلې. »
زده کوونکی الماس وايي: « هیله لرو دغه شان نور ګامونه هم پورته شي، زموږ په نورو ولسوالیو کې هم ګڼ ښوونځي ودانۍ نه لري.»
د پکتیا په مرکز ګردېز او یو شمیر ولسوالیو کې د ښوونځیو دا ۱۸ ودانۍ داسې مهال ګټه اخستنې ته سپارل کېږي چې لا هم د دې ولایت بېلابېلو سیمو کې د لسګونه بې سرپناه ښوونځیو ترڅنګ د پوهنې په وړاندې پراخې ستونزې شته دي.
