وال سټريټ ژورنال ورځپاڼې د امريکا د حکومتي سرچينو له قوله راپور ورکړی چې واشنګټن د افغانستان له حکومت سره مذاکرات پيل کړي، ترڅو د سرچینې په خبره، امريکايي پوځيان له بګرام هوايي اډې ترهګرۍ سره په مبارزې کې فعاله ونډه واخلي.
دې سرچينې وال سټريټ ژورنال ته ويلي، امريکا په دې اړه خپل مذاکرات د اډم بولر په مشرۍ تعقيبوي چې امنيتي همکارۍ، اقتصادي هوکړې او د بنديانو تبادله هم په کې شامل دي.
راپور زیاته کړې، واشنګټن په بګرام پوځي اډه کې د امريکايي ځواکونو د حضور پر سر د افغانستان له حکومت سره مذاکراتو ته دوام ورکړی.
وال سټريټ ژورنال وړاندې لیکلي: « دا مذاکرات چې د اډم بولر په مشرۍ ترسره کېږي، د امکان تر حده د زندانيانو په خوشي کولو، احتمالي اقتصادي هوکړې او امنيتي همکاريو تمرکز لري.»
د وال سټريټ ژورنال ورځپاڼې د راپور پر بنسټ، واشنګټن د بګرام په پوځي اډې کې خپل پوځي حضور له سيمه ييزې ترهګرۍ سره د مبارزې لپاره جدي اړتيا بولي.
له دې سره هم مهاله، د افغانستان سولې لپاره د امريکا پخواني ځانګړي استازي چې څو ورځې وړاندې کابل ته هم راغلی و، د امريکا له لوري په سيمه کې له ترهګرۍ سره مبارزه مهمه بولي او د دوه اړخيزو ګټو پربنسټ يې اړيکې او تعاملات ګټور ګڼلي.
زلمي خلیلزاد پر خپله اېکس پاڼه لیکلي: « افغانستان او متحده ایالات دواړه له پیاوړو اړیکو څخه ګټه پورته کولی شي. د متحده ایالاتو لپاره یو څرګند او مهم ډګر د ترهګرۍ پر ضد مبارزه ده. افغانان خپلې ځانګړې وجهې لري چې ښې اړیکې ولټوي، په ځانګړې توګه د ګاونډیانو له ګواښونو او ننګونو سره د مخامخ کېدو له امله. دا مهال سمدستي خنډ د بندیانو او یرغملو موضوع ده. دا خورا اړینه ده چې دا خنډ هر څومره ژر لرې شي.»
د امريکا ولسمشر ډونالډ ټرمپ په بریټانیا کې د يوې ناستې پر مهال د بګرام اډه له چين سره د نږدېوالي او د بېجېنګ اټومي ځواک څارولو لپاره مهمه بللې او پر بيا نيولو يې ټينګار کړی.
ها خوا، د چين بهرنيو چارو وزارت بيا په بګرام پوځي اډه کې د امريکا بياځلي حضور د سيمه ييز تقابل زياتېدو ټکی ياد کړی او د افغانستان ملي حاکميت ته درناوی يې د افغانانو حق ګڼلی.
د چين بهرنيو چارو وزارت وياند لين جيان ویلي: « چین د افغانستان خپلواکۍ، حاکمیت او ځمکنۍ بشپړتیا ته درناوی لري. د افغانستان راتلونکی باید د افغانانو په لاس کې وي او موږ په دې ټينګار کو چې په سیمه کې د تاوتریخوالي او شخړو راپورته کولو ملاتړ بايد و نه شي. موږ هیله لرو ټول اړخونه د سیمې د سولې او ثبات لپاره رغنده رول ولوبوي.»
د بګرام پوځي اډې په اړه د واشنګټن او بېجینګ ترمنځ له سياسي ناندريو وروسته، د افغانستان حکومت په دې برخه کې له امريکا سره هر ډول خبرې ردوي.
د بهرنيو چارو وزارت درېيم سياسي ریيس وايي، کابل له واشنګټن سره د مثبتو سياسي او اقتصادي همکاريو غوښتونکی دی، خو د بګرام په پوځي اډه کې د دې هېواد هر ډول حضور په اړه غوښتنې ورته د منلو نه دي.
له بلې خوا، کارپوهان د امريکا ولسمشر له خوا په منځني ختیځ او اوکراين کې د جګړو پای ته رسولو په تړاو بې پايلې ژمنو او پرخپلو متحدينو د لوړو تعرفو لګولو پرېکړو ته په اشارې، د بګرام پوځي اډې نيول هم د نوموړي يو تش سياسي شعار ګڼي.
د سياسي چارو شنونکی معين ګل څمکنی وايي: « د ټرمپ په خبرو ډېر باور هم نه دی په کار، ځکه هغه کاناډا هم د امریکا ۵۱ ایالت غوښت او دغه راز یې د ګرین لنډ غوښتنه هم کوله، د اوکراین جګړه یې هم پای ته رسوله مګر په دې ټولو کې پاتې راغی. حتا د درنو تعرفو وضع کولو له امله یې خپل تاریخي دوستان هم له لاسه ورکړل. ټرامپ په امریکا کې له سترو کورنیو ستونزو سره هم مخ دی؛ د دوی په تاریخ کې لومړی ځل دی چې ملي ګارد ښارونو ته راوځي او لاریونونه ځي. نو دا ډېره ستونزه مسئله ده او امریکا باید له ځان سره فکر وکړي.»
د بګرام پوځي اډه په ۱۹۵۰ زېږدیز کال د شوروي اتحاد ځواکونو له خوا د افغانستان د وخت حکومت لپاره جوړه شوې وه چې له ۷۵ کلونو راهيسې د شوروي اتحاد، امريکايي ځواکونو او افغان حکومتونو له خوا کارېدلې ده.
