امنیت شورا د یو شمېر طالب مشرانو د سفرونو معافیت موده درې میاشتې نوره تمدید کړه

د ملګرو ملتونو  امنیت شورا د بندیزونو کمېټې ویلي، د اسلامي امارت د مشرانو د سفر بندیز یوازې د سولې په ناستو کې د ګډون لپاره غځول شوی دی.

دغې کمیټې دغه راز پرېکړه کړېده،چې د اسلامي امارت د مشرانو د سفرونو د معافیت ترڅنګ د افغانستان ځنې کنګل شوې پیسې هم خوشې کړي.

د مالوماتو له مخې،ملا عبدالغني برادر،عبدالسلام حنفي، نورالله نوري، امیر خان متقي، شیر محمد عباس ستانکزی، خیرالله خیرخواه او یو شمېر نور طالب مشران د سفر معافیت د نورو درې میاشتو لپاره وغځول شو.

دغه موده د تیرې پنجشنبې ورځ پای ته رسېدلې وه،چې د ملګرو ملتونو د امنیت شورا بیا تمدید کړ.

اسلامي امارت له دې پرېکړې هرکلى کړی او زیاته کړې یې ده،چې د دوحې هوکړې سره سم باید امریکا او ملګري ملتونه له تور لیسته د افغانستان د اسلامي امارت د چارواکو نومونه په بشپړه توګه لرې کړي.