ننګرهار د ختیځ زون مرکز او د هېواد له لومړۍ درجه ولایتونو ګڼل کېږي او له دې وړاندې د یوشمېر امنیتي پېښو کوربه و، خو له سیاسي تحول وروسته د شوکو، بانډونو، وسله والو غلو او امنیت ضد پېښو کچه په کې د پام وړ کمه شوې ده.
د دې ولايت د امنیه قومندانۍ د امنیتي چارو مرستیال له شمشاد سره په ځانګړې مرکه کې وایي، د تېرو څلورو کلونو پرمهال په جلال اباد ښار او لسواليو کې د بېلابېلو جرمونو په تور نږدې ۵ زره کسان نیول شوي دي.
مولوي طاهر مبارز زیاتوي، نیول شویو کسانو په وسله والو غلاوو، انسان تښتونې، وژنې، نشه یي توکو کښت، قاچاق، او بېلابېلو غیر قانوني کړنو کې لاس درلوده او تر لومړنيو څېړنو وروسته عدلیي او قضايي ارګانونو ته سپارل شوي دي.
د ننګرهار د امنیه قومندانۍ د امنیتي چارو مرستیال مولوي طاهر مبارز وايي: « شاوخوا پنځه زره مجرمان مو په تېرو څلورو کالو کې نیولي او محکمو ته مو سپارلي دي. دغه کسان د غلاګانو، وژنو، برمته نیونو، کورنیو شخړو او نورو جرمونو په تور نیول شوي دي. دغه راز په تېرو څلورو کالو کې عادي غلاګانې لوړ ګراف لري، خو وژنې تر ټولو ټیټ ګراف لري.»
مبارز دغه راز وایي، د اسلامي امارت امنیتي ځواکونه د هېوادوالو د امنیت د ټینګښت مسوولیت پر غاړه لري او هڅه کوي هغه کسان ونیسي چې په ناامنیو کې ښکېل وي.
د ننګرهارامنیه قومندانۍ د مسوولانو د معلوماتو له مخې، په تېرو څلورو کالونو کې د دې ولایت په بېلابېلو سیمو کې زرګونه جرېبه ځمکه هم د کوکنارو او بنګو له کرکیلې پاکه شوې ده.
د طاهر مبارز په خبره، امنيتي ځواکونو په ياده موده کې په جلال اباد ښار او ولسواليو کې د نشه يي توکو پر ضد له ۱ زر ۳۰۰ ډېر عملیات ترسره کړي چې په پایله کې يې د نشه يي توکو کښت، پروسېس او قاچاق په تور له ۲ زرو ډېر کسان نیول شوي دي.
د ننګرهار امنیه قومندانۍ د امنیتي چارو مرستیال مولوي طاهر مبارز په دې اړه وايي: « د ننګرهار ولایت امنیه قوماندانۍ کې له نشه يي توکو سره د مبارزې آمریت په تېرو څلورو کالو کې ۱ زر ۳۵۴ پېښې ثبت کړې چې په کې ۲ زره ۵۷۶ تنه مظنونین، قاچاقبران او ساقیان نیولي او تر لومړنیو څېړنو وروسته اړند قضايي ارګانونو ته سپارل شوي دي.»
د ننګرهار امنیه قومندانۍ امنیتي چارو مرستیال دغه راز وايي، په جلال اباد ښار او ځينو مهمو ځایونو کې ۳۰۰ امنیتي کمرې لګول شوې دي او په خبره یې، د امنیتي کمرو نصبېدل به په دې ښار کې د جنایي جرمونو کچه هم راټيټه کړي.
مولوي طاهر مبارز زیاتوي: « شاوخوا ۳۰۰ کمرې لګول شوې دي او دا مهال د کورنیو چارو وزارت د مخابرې او ټکنالوژۍ ریاست پلاوی هم راغلی او ښايي د ننګرهار په ټولو ساحو کې امنیتي کمرې ولګوي. موږ هم کورنیو چارو وزارت ته وړاندیز کړی او وزارت هم په پلان کې لري چې زرګونه امنیتي کمرې ولګوي.»
مولوي طاهر مبارز د دې مرکې یوه بله برخه کې وایي، د کابل – جلال اباد پر لویه لاره په تېرو څلورو کلونو کې ۴۱۸ ټرافیکي پېښو له امله ٣٤٤ تنه مړه شوي او له ٦٠۰ ډېر ټپیان شوي دي.
