پوټين: مسکو له نړیوالې ټولنې سره پر ګډه پرېکړه کوي چې ا.ا پر رسمیت وپېژني

د روسیې ولسمشر ولادمیر پوتین ویلي، هېواد له نړیوالې ټولنې سره پر ګډه پرېکړه کوي،چې د اسلامي امارت پر رسیمت وپېژني. 

پوتین ویلي،  د دې لپاره باید اسلامي امارت د خپل حکومت ټولشمول والی باوري کړي.

پوتین زیاته کړې:«په ټوله کې به له واقعیتونو پیل وکړم. حقیقت دا ده،چې په افغانستان کې موجود قوت باید تیار وي،چې د ټولو قومونو استازي د هېواد په مشرتابه کې ګډون ولري.»

پوټین یو ځل پر هغه څه اندېښنه وښوده،چې تل یې له افغانستانه لري، مخدره موادو قاچاق او منځنۍ اسیا هېوادونو ته د ناامنیو پراخیدل.

پوتین  زیاتوي:«دا زموږ لپاره بې ارزښته خبره نه ده.موږ د منځنۍ اسیا له هېوادونو سره پرانیستې پولي لرو. دې هېوادونو کې د اورپکو ډلو نفوذ زموږ لپاره د اندېښنې وړ او ګواښوونکی دی.» 

خو اسلامي امارت بیا دغو اندېښنو ته په ځواب ویلي،خاوره یې د بل چا پر ضد نه شي کاریدلی او د نشه يي توکو کرکیله به صفر ته راښکته شي.

بل پلو د سیاسي چارو کارپوهان وایي، روسیه له نوې ترهګرۍ ګټه اخلي او د سیمې هېوادونه په لوی لاس د سیاسي موخو لپاره د داعش او مخدره توکو په قاچاق ډاروي.

 دوی ټېنګار وکړ،که روسیه افغانستان سره ښې اړیکې جوړل غواړي،باید امریکا ته په تمه پاتې نه شي او دلته د طالبانو په لاس رامنځ ته شوی حکومت پر رسمیت ومني.

په داسې حال کې چې اسلامي امارت د خپل حکومت پر ټولشمولوالي ټینګار لري،خو د روسیې په ګډون د سیمې او نړۍ ډېر شمېر هېوادونه لاهم په دې برخه کې په اسلامي امارت باوري نه ښکاري.