په هېواد کې د نفتي توکو د بیو لوړوالي له زیاتېدونکو اندېښنو سره هم مهاله، په بلخ کې د نفتو توکو د بیو کنټرول او منظم وېش په موخه ځانګړی مارکېټ پرانستل شو.
دغه بازار چې په مزار هوټل سوداګریز مارکیټ کې جوړ شوی، چارواکي یې موخه بازراونو ته په مناسبه بیه د نفتي توکوعرضه کول او د احتکار مخنیوی بولي.
د مزار هوټل سوداګریز مارکېټ مسوول مصطفی مومند وايي: « موږ تاسو نه سم بازار درلود، نه بولی او نه هم مناسب ځای. تاسو نن ولیدل چې دلته د تېلو او ګازو د بولۍ بازار پرانستل شو. د بازار له پرانستلو سره سم زموږ سوداګرو د نفتي توکو د فروش اعلان وکړ او ورسره سم د بازار نرخونه هم ټیټ شول.»
په ورته مهال، چارواکي وايي، دغه بولۍ د اقتصادي پیاوړتیا په برخه کې اغېزناک ده او زیاتوي چې سوداګر دې په نورو برخو کې هم پانګونه وکړي.
د دولتي هوټلونو اجراییوي رییس مولوي عبدالمنان مبارک وايي: « دا مرکز د افغانستان اقتصاد ته نوې ساه ورکوي، د خلکو د باور، نړیوال اعتبار او پانګونې را جلبېدو لپاره به یو مهم ګام وګرځي. موږ باور لرو چې د دې مرکز په جوړېدو سره به افغانستان د سیمې د انرژۍ په یوه مهمه دروازه بدل شي. د دې مرکز پرانستل به د نفتي توکو د مافیا کاروبار ختم کړي او له دې وروسته به بولۍ په شفاف ډول ملي ګټو ته په کتو ترسره کېږي.»
د بلخ مرستیال والي مولوي نورالهادي ابوادریس وايي: « تاسو راشئ، اسلامي امارت د هرڅه زمینه برابره کړې. اسلامي امارت ستاسو همکار دی او هرڅه یې چې وس کې وي، له تاسو یې نه درېغوي.»
بله خوا، یو شمېر سوداګر او د خصوصي سکټور استازي د دې اقدام هرکلی کوي او هیله څرګندوي چې د دې بازار دوامداره فعالیت به د تېلو د بیو په ټیټ ساتلو کې مثبت اغېز ولري.
دوی همدا راز ټینګار کوي چې د مارکېټ په اډانه کې د سوداګرو ګومارنې په تړاو شفافیت ته پام وشي، ترڅو راتلونکي کې د احتکارمخنیوی وشي او خلکو ته د نړیوال بازار مطابق نفتي توکي ورسيږي.
د بلخ صنایعو او کانونو خونې رییس امام الدین سنايي زاده وايي: « باید دا تثبیت شي چې کله څوک د بولۍ بازار ته ننوځي، تضمین شوی او د باور وړ تاجر وي او داسې څوک نه وي چې زموږ ملي تجارانو ته زیان ورسوي.»
د تېلو سوداګر جاوېد شېرزاد وايي: « دلته د بازار جوړېدل مشتریانو ته سهولت رامنځته کوي. دلته مشتریان کولی شي له واردوونکو شرکتونو سره په ډېره اسانۍ اړیکه ونیسي او په پوره ډاډ سره خریداري وکړي.»
تر دې وړاندې په مزارهوټل کې د صرافانو لپاره هم ځانګړی ځای په نښه شوی و. شنونکي وايي، دغه شان بازارونه د ګڼه د ګوڼې کموالو او تر پېرودونکو پورې د اجناسو او خدماتونو رسولو د چټکتیا لپاره مهم بولي.
