Skip to content
دملګرو ملتونو امنیت شورا د چهار شنبې پر ورځ د « ۱۴۰۰ کال د مرغومې پر ۲ مه» د امریکا لخوا وړاندیز شوی پرېکړه لیک چې له مخې یې پر افغانستان لګېدلي مالي بندیزونه کمېږي او د مرستو رسولو کې اسانتیاوې رامنځته کېږي، تصویب کړ.
خو دغه پرېکړه لیک د تیرې دوشنبې په ورځ چین او روسیې رد کړی و او ویلي یې وو،چې د مصنوعي شرطونو یا محدودیتونو رامنځته کول ورته د منلو نه دي.
د فرانسې خبري اژانس د یوه دیپلومات له قوله ویلي،چین او روسیې د مخکیني وړاندیز شوي پرېکړه لیک د یوې مادې لېرې کولو غوښتنه درلوده، چې له مخې به یې کنګل شویو شتمنیو ته په هر مورد کې د اړتیا له مخې د لاسرسي اجازه ورکول کېده.
دیپلوماتیکې سرچینې ويلي،د لومړني پرېکړه لیک مسوده نه یوازې د چین او روسیې لخوا رد شوې وه، بلکې د هند، فرانسې او بریتانیا له خوا هم رد شوې وه.
