پاکستان موده وړاندې د خپلې ادعا له مخې چې د اثبات لپاره یې هېڅ راز اسناد او شواهد نه لري، په افغانستان کې د پاکستان ضد عناصرو موجوديت د کابل او اسلام اباد ترمنځ په اړيکو کې عمده خنډ ياد کړی و؛ خو اوس په خپله د دې هېواد پخوانی لومړی وزير عمران خان اعتراف کوي چې دا اړيکې د پاکستان پوځ خرابوي.
هغه د پوځ لوی درستز عاصم منير تورن کړی چې د لوېديځ خوشاله کولو لپاره یې له افغانستان سره د اړيکو ښه کېدو مخه نيولې او په خبره يې، دا پاليسي له سولې سره په تضاد کې ده.
عمران خان سولې ته د رسېدو لپاره د افغانستان اوسني حکومت، ولس او د قبايلي سیمو د اوسېدونکو همکاري حياتي بللې او وړانديز يې کړی چې د پښتونخوا عواملي ملي ګوند مشر محمود خان اڅګزي په مشرۍ دې يو پلاوی کابل ته د سولې مذاکراتو لپاره ولېږل شي.
د پاکستان پخواني لومړي وزیر عمران خان ویلي: « له کومې ورځې چې عاصم منیر د پاکستان د لوی درستیز په توګه دنده پیل کړې، له افغانستان سره قصدا ً د اړیکو خرابولو هڅې روانې دي او په پرله پسې ډول پر هغوی پاکستان کې د جګړې ترسره کولو تورنه لګوي، ترڅو د افغانستان اوسني حکومت مخالفې خواوې او نظرونه پرې خوښ کړي او ځان د لوېدیځ په سترګو کې د یوه ساتونکي په توګه مطرح کړي.»
عمران خان په وروستيو کې د ملکي مرګ ژوبلې په شمول د ډېر شمېر پاکستاني پوځيانو او پوليسو وژل کېدل هم د عاصم منير د پالیسيو محصول بولي او وايي، پر افغان خاورې له بريد سربېره هم په قبايلي سيمو کې د ترهګرۍ په پلمه عمليات ترسره کېږي.
عمران خان په دې اړه زیاته کړې: « لومړی یې د افغانستان حکومت ته ګواښونه او اخطارونه ورکړل، بیا يې د ټولو دیني، اخلاقي او د کډوالو د قوانینو او اصولو خلاف دلته له شاوخوا ۳۰ کلونو راهیسې اوسېدونکي افغان وروڼه په زور له دې هېواده و ایستل. له هغې وروسته یې پر افغان خاوره بریدونه وکړل او اوس د ترهګرۍ په پلمه په قبايلي سیمو کې پوځي عملیات کوي.»
ځينې ازاد خبریالان هم مني چې د پاکستان تر کنټرول لاندې سیمو کې امنیتي وضعیت پېچلی شوی او په خبره یې، کابو کول يې يوازې د مذاکراتو له لارې ممکن دي.
پاکستان مېشت ازاد خبریال طاهرخان وايي: « په پاکستان کې د تشدد پېښې او بریدونه زیات شوي، د پاکستان امنیتي ځواکونو ځاني زیان هم ډېر شوی او دغه راز مخالفو وسله والو ته هم مرګ ژوبله اوړي او دا یو مشکل حالت دی. ترهغو چې دا حالات روان وي، زه فکر نه کوم د افغانستان او پاکستان ترمنځ اړیکې ښې شي، خو باید ووایم لکه څرنګه چې د پاکستان حکومت یو وخت نړۍ ته ویل چې د طالبانو له حکومت سره خبرې او تعامل وکړي، نو خبر دا ده چې پاکستان سره هم له خبرو اترو او مذاکراتو پرته بله لاره نه شته.»
د پوځي چارو شنونکي هم د عمران خان له څرګندونو سره د نظر يوالی ښيي او زياتوي، پاکستان له څو لسيزو راهيسې له افغانستان سره پر تقابل د ولاړو پاليسيو له مخې، نه غواړي په افغانستان کې نظامونه ثبات او استحکام پيدا کړي.
د پوځي چارو شنونکی توریالی ځاځی وايي: « د پاکستان له جوړېدو راهیسې د افغانستان د نظامونو او خلکو پر وړاندې دا دښمني ادامه لري. د پاکستان پر مشرانو او سیاستوالو باور کول لویه تېروتنه ده؛ د دوی په خوله کې شهد او په زړه کې زهر ځای لري.»
د دوشنبې په ورځ د افغانستان سولې لپاره د امريکا پخواني ځانګړي استازي هم ویلي و چې پاکستان دې د زور کارولو په ځای تر خپل کنټرول لاندې سيمو کې د امنيت ټينګښت لپاره له تحريک طالبان پاکستان(ټي.ټي.پي) سره خبرې وکړي او دواړه متخاصم اړخونه د خبرو مېز ته له کېناستو سره، د ستونزې سياسي حل پيدا کړي.
