د ایران صنعت، سوداګرۍ او کانونو وزیر سید محمد اتابک په مشرۍ راغلي ایراني پلاوي د ریاست الوزرا له اقتصادي مرستیال ملاعبدالغني برادر سره لیدلي. په دې لیدنه کې د کابینې نورو غړیو هم حضور درلود.
چارواکي وايي، لیدنه کې ملا عبدالغني برادر له ایراني لوري سره د کابل او تهران ترمنځ پر سوداګرۍ، ټرانزیټ، ګډې پانګونې، چابهار بندر او د دواړو هېوادونو ترمنځ د ټاکل شوې ګډې اقتصادي کمېټې د کارونو چټکتیا او لا موثریت په تړاو خبرې کړې.
د اسلامي امارت د ویاند مرستیال حمد الله فطرت وايي: « د ریاست الوزرا اقتصادي مرستیال محترم ملا عبدالغني برادر اخوند نن په خپل کاري دفتر کې د ایران اسلامي جمهوریت د صنعت، سوداګرۍ او کانونو له وزیر ښاغلي سید محمد اتابک او مل پلاوي سره وکتل. د دې لیدنې پرمهال دواړو لورو د افغانستان او ایران ترمنځ د سوداګرۍ، ترانزیټ، پانګونې چابهار بندر او د دواړو هېوادونو ترمنځ د مشترکې اقتصادي کمېټې د کارونو او لا موثریت په اړه هر اړخیزې خبرې وکړې.»
کارپوهان بیا د افغانستان او ګاونډیو هېوادونو ترمنځ ښې اړیکې د افغانانو په ګټه بولي او زیاتوي چې د اقتصادي او سوداګریزو مسایلو په تړاو کابل ته د نورو هېوادونو او په تېره بیا د ایراني پلاوي راتګ له اقتصادي پلوه د افغانستان لپاره ګټور تمامیږي.
د اقتصادي چارو شنونکی عبدالجبار ساپی وايي: « پلاوی چې راځي، نو قراردادونه کوي، په اقتصادي، امنیتي، سیاسي او نورو برخو کې هوکړه لیکونه لاسلیکوي یا پرې بحثونه کوي او دا خبرې د دواړو هېوادونو په ګټه دي او په اقتصادي برخه کې مثبت اغېز لري.»
په ټوله کې د کارپوهانو باور دا دی چې له ګاونډيو هېوادونو سره اړیکې نه یوازې سوداګرۍ او اقتصاد ته وده ورکوي بلکې د امنیت د لاښه کېدو ترڅنګ، د ثبات له ټینګېدوسره هم مرسته کوي.
د سياسي چارو شنونکی سلیم پیګیر وايي: « ایران زموږ نږدې ګاونډی دی او له اسلامي امارت سره ښې اړیکې لري. دوی هر کال افغانستان ته تر ۳ میلیارد ډالرو صادرات لري. هرڅومره چې له دې هېوادونو سره ښې اړیکې ولرو، زموږ صادرات او واردات زیات شي، د دواړو هېوادونو په ګټه دي.»
په دې لیدنه کې چې د افغان او ایراني چارواکو ترمنځ ترسره شوې، د اسلامي امارت د کابینې یوشمیر غړیو هم حضور درلود.
ایران د افغانستان ګاونډی هېواد دی چې له افغانستان سره په خپلې اوږدې پولې کې د تګ راتګ څو لارې او بندرونه لري. پر دغو لارو او بندرونو اوسمهال د خلکو د تګ راتګ ترڅنګ، سوداګري او ټرانزیت هم ترسره کېږي.
