واک ته د اوسني حکومت د رسېدو څلورو کلونو له پوره کېدو وروسته، د افغانستان سولې لپاره د امريکا پخواني ځانګړي استازي زلمي خليلزاد يو وار بيا د افغانستان د سولې بحث مطرح کړی.
نوموړي د څو لسيزو په اوږدو کې د جګړې له امله د مرګونو يادونه کړې او زياته کړې يې ده چې دا مرګونه بايد افغانانو ته خبرداری وي، ترڅو د سولې لار ولټوي.
خلیلزاد په دې اړه ویلي: « د تېرو ۴۵ کلونو په اوږدو کې د څو جګړو له امله د سلګونو زرو خلکو مړینه باید ټولو افغانانو ته یو خبرداری وي چې سولې ته لاره ولټوي.»
د سیاسي چارو شنونکي تېرې جګړې پر افغانانو تپل شوې بولي او زياتوي چې په خپله خوښه يې نه دي کړې.
دوی په يادو جګړو کې ځينې هېوادونه ښکېل ګڼي او باور لري چې د خپلو ګټو خونديتوب او ترلاسه کولو لپاره يې افغانستان د اور خوراک کړ.
د سیاسي چارو شنونکی واحدالله فقیري وايي: « په دې وروستیو کې د ښاغلي خلیلزاد ټویټونه ډېر شوي او داسې ښکاري چې نوموړی د جګړو له ډېرېدو اندېښمن دی او له همدې امله کوښښ کوي افغانانو ته ووایي چې افغانستان باید یوې بلې جګړې ته سوق نه شي؛ ځکه داخلي جګړې تباه کوونکې دي او د افغانستان په ضرر تمامېږي.»
ځينې نور شنونکي هم په افغانستان کې د تل پاتې سولې لپاره د شرايطو پر برابرولو ټينګار لري او زياتوي چې اوسنی حکومت دې ځان ته د خلکو په نږدې کولو او د دوی د مشروع غوښتنو په منلو سره، د جګړې ټولې پلمې ختمې کړي.
د سیاسي چارو شنونکی شهسوار سنګروال وايي: « اوس د دې وخت دی چې د افغانستان ټول ښکېل اړخونه د سولې او سیاسي وضعیت د ښه کېدو او د اقتصادي ودې لپاره ګډ کار وکړي. زه فکر کوم د خلیلزاد د خبرو مانا هم همدا ده.»
خليلزاد داسې مهال په افغانستان کې د تل پاتې سولې خبره کوي چې له دې وړاندې يې په سيمه کې د ترهګرۍ د ودې په اړه اندېښنه ښودلې وه او پاکستان يې تورن کړی چې داعش ډلې ته یې خوندي پټنځایونه ورکړي او بشپړ ملاتړ یې کوي.
