ملګري ملتونه د اسلامي همکاریو د سازمان له پریکړو ملاتړ کوي

د اسلامي هېوادونو سازمان کې د ملګرو ملتونو استازي ویلي،د افغانستان په تړاو  د یاد سازمان له هرې پریکړې ملاتړ کوي.

دغه استازي دا څرګندونې نن په اسلام اباد کې د اسلامي  همکاریو سازمان په ناسته کې وکړې.

د اسلامي همکاریو سازمان په ننۍ ناسته کې د افغانستان څوکۍ خالي ده  او د  اسلامي امارت بهرنیو چارو  چارسمبالي وزیر چې دغه غونډه کې ګډون لري،جدا ځای کې ناست دی.

نن د پاکستان مرکز  اسلام اباد کې د سعودي عربستان په مشرۍ د افغانستان په تړاو د اسلامي همکاریو سازمان غونډه روانه ده.

دغې ناسته کې د ګډون لپاره د غړو هېوادونو سربیره د چین، روسیې، جرمني او ځینی نورو اروپايي هیوادونو او د یوشمېر مرستندویه نړیوالو بنسټونو استازو په ګډون د نږدې ۹۰ هېوادونو  او سازمانونو۴۳۷ استازي برخه اخلي.

پاکستان کې افغان سفارت ویلي، دغه ناسته افغانانو لپاره پر بشري مرستو، د افغانستان کنګل شویو پیسو ازادیدل، د نړی له لوري د اسلامي امارت په رسمیت پیژندو او نورو اړوندو موضوعاتو باندې راڅرخي.