Skip to content
د سیاسي چارو یو شمېر کارپوهان وايي، تېر نظام په اصل کې وجود نه لري او شته نظام د نړیوالو له لوري د لازم مشروعیت جوګه شوي نه دي،نو ملګرو ملتونو کې د افغانستان استازولۍ دا پریکړه دې ولس ته پریښودل شي.
د سیاسي چارو کارپوه اجمل سهېل وايي:« دغه د ملګرو ملتونو نمایندګي نه د طالبانو پورې اړه لري ځکه هغوی او د هغوی کړنې د نړیوالو له لوري قانوني مشروعیت نه لري او نه د تېر حکومت پورې اړه لري ځکه هغه په اصل کې وجود نه لري نو دا څوکۍ دې ولس ته ورکړل شي چې هغوی د یوې جرګې له لارې ورته وړ کس وټاکي.»
وروسته له هغې چې په ملګرو ملتونو کې د جمهوریت استازي غلام محمد اسحاقزي استعفاء ورکړه،دغه څوکۍ ته د سرپرست په توګه نصیر احمد فایق وټاکل شو.
نصیر احمد فایق تر دې وړاندې په ملګرو ملتونو کې د افغانستان د دایمي استازولۍ د مستشار دنده پر مخ وړله.
د اسلامي امارت له لوري په ملګرو ملتونو کې د افغانستان استازولۍ ته ور پیژندل شوي استازي سهیل شاهین بیا ملګري ملتونه ننګولي،چې هغوی په بې پریتوب پیژندل کیږي او اوس یې باید ثابت کړي.
شاهین زیاته کړې:« ملګري ملتونه داسې یو نړیوال بنسټ دی،چې د خپل بې پریتوب لپاره پیژندل کېږي. هېله ده،چې هغوی دغه څوکۍ د اوسني حکومت استازي ته وسپاري او په دې سره خپل بې پرې توب ثابت کړي.»
یو شمېر نور بیا په دې اند دي،چې نصیر احمد فایق د ملګرو ملتونو له لوري غوره شوی او اسلامي امارات دې ځان د دې جوګه کړي،چې د نړیوالو له لوري ومنل شي، بیا دې ملګرو ملتونو ته استازی واستوي.
اسلامي امارات او په ځانګړې توګه د هغوی له لوري دغې څوکۍ ته پیژندل شوي استازي سهیل شاهین تر دې وړاندې د اسحاقزي د شتون پر وړاندې هم څو ځل پرخپله ټویټر پاڼه توند غبرګون ښودلی وو.
