د مزارشريف- دره صوف ترمنځ د غځېدلي سړک دویم فاز د بیا رغونې چارې د ټولګټو چارو وزارت له لوري پيل شوې.
دغه سړک چې د درنو باروړونکو موټرو د تګ را تګ له امله ویجاړ شوی و، اوس يې د ټولګټو چارو وزارت د ١٥٩میلیونو افغانیو په ارزښت د بیارغونې چارې پیل کړې دي.
ځايي مسوولین وايي، د یاد سړک رغنیزې چارې د بلخ له شولګرې ولسوالۍ پیل او د ٥٦ کیلومتره په اوږدوالي د سمنګانو ولایت د دره صوف ولسوالۍ تر مربوطاتو د یوه کال په موده کې په اساسي ډول جوړېږي.
د بلخ ټولګټو چارو رییس مولوي عبدالصبور صابري وايي: « دا د مزارشریف – دره صوف عمومي لویه لاره ده چې څه باندې ۵۶ کیلیومټره اوږدوالی او ۷ متر عرض لري. دا د شولګرې ولسوالۍ له قربه خانې سیمې پيل کېږي او د سمنګان ولایت تر حدبخشي پورې غځېږي. دا سړک د افغانستان اسلامي امارت د ټولګټو وزارت په ۱۵۹ میلیونه افغانیو بودیجې سره جوړېږي.»
د تطبیق کوونکي شرکت مسوول محمد لایق وايي: « د دې په بیا رغونه کې هغه ځایونه په پام کې نیول شوي چې ډېر تخریب دي، ځينې ځایونه یوازې داغ ګیرۍ ته اړتیا لري. د کوتل اړوند ساحې ټولې طبقې به په اساسي توګه جوړې شي.»
ځايې چارواکي ډاډ ورکوي چې د لرو پرتو سیمو خلکو لپاره اسانتیاوې ورته مهمې دي او په خبره هڅه کوي چې د کلیوالي سیمو اوسېدونکو ته د ژوند اړینې اسانتیاوې برابرې کړي.
د بلخ د والي مرستیال مولوي نورالهادي ابو ادریس وايي: « اسلامي امارت ژمن دی چې د افغانستان ټولو ولایتونو، ولسوالیو او کلیو ته سړکونه وغځوي. همدارنګه اوبو او برېښنا ته یې هم پام دی. موږ څو ورځې وړاندې جلسه درلوده او په کې د ټولو ریاستونو رییسان او د موسسو مشران موجود وو. پرېکړه وشوه چې ټولو ولسوالیو ته به لمریزه برېښنا چمتو کېږي.»
ځايي اوسېدونکي د مزارشريف- دره صوف سړک د تخریب شویو ځایونو د بیارغونې چارو له پیل هرکلی کوي او له مسوولینو په نورو برخو کې هم د ورته پروژو د پیل غوښتنه کوي.
د سیمې اوسېدونکی فضل الله وايي: « په دې سیمه کې سړک ډېر خراب دی او خلک ستونزې لري. له دې امله په دې لاره ډېرې ټرافیکي پېښې کېدلې؛ که دا سړک جوړ شي، هم د خلکو پر ګټه دی او هم د حکومت.»
د سیمې اوسېدونکی لطف الله وايي: « هره ورځ د حادثو او موټرو د چپه کېدو شاهدان یو. په کوتل کې سړک لکه دېوال جوړ شوی و. دا د شکر ځای دی چې نن د دې سړک د بیارغونې د پيل شاهدان یو.»
د یادونې وړ ده چې دا سړک د بلخ پر شولګرې او کشندې ولسوالیو سربېره د سرپل او سمنګان ولایتونو یو شمېر ولسوالۍ هم له مزارشريف ښار سره نښلوي او هره ورځ پرې له سلګونو کلیوالو موټرو سربېره، د دره صوف ډبرو سکرو کانونو ته لسګونه لارۍ هم تګ راتګ کوي.
