د هلمند سیمه ییز مسوولین وایي، په مرکز لښکرګاه کې د هلمند پر سیند د ٣.٢ میلیونه امریکایې ډالرو په لګښت د ٣٤٠ مترو په اوږدوالي او٩ متره سور په لرلو سره، یو لوی پل جوړوي چې د دې پله جوړېدل به دوه کلونه وخت ونیسي.
مسوولین وايي، دغه پل به د هلمند شمالي ولسوالیو اوسېدونکو لپاره د تګ راتګ ترڅنګ د کرنې، سوداګرۍ او اقتصادي چارو د اسانتیا لامل شي.
د هلمند والي ویاند محمد قاسم ریاض وايي: « د هلمند ولایت مقام په هڅو او په زیار او د افغانستان اسلامي امارت د اطلاعاتو او فرهنګ وزارت د ګرځندوی معینیت د عوایدو په لګښت چې ۳ میلیونه ۲۰۰ زره امریکايي ډالر کېږي، دا پل جوړېږي. دا به ۳۴۰ متره اوږدوالی او ۹ متره پلنوالی ولري، د دوو کالو په اوږدو کې د یوه خصوصي شرکت له خوا جوړېږي.»
په ورته مهال، د همدې پله په مسیر کې د بابا جي ولسوالۍ ١٠.٥ کیلومټره سړک هم ګټه اخیستې ته وسپارل شو. د چارواکو په خبره، د دې سړک په جوړولو ١.٧ میلیونه امریکایې ډالره لګښت راغلی او د ولایت مقام په مالي او تخنیکې همکارۍ په اساسې ډول تر جوړولو وروسته، ګټه اخیستنې ته سپارل شوی دی.
د دې سړک په اوږدو کې د اوبو د ایستلو لپاره کانالونه، پلچکونه او نورې اړینې تخنیکي اسانتیاوي هم په پام کي نیول شوې دي.
د هلمند د والي ویاند په دې اړه وايي: « له دې پله سره څنګ کې، د هلمند له سیند څخه تر بغرا پورې په باباجي ولسوالۍ کې لس کیلومټره سړک د ۱.۷ میلیونه امریکايي ډالرو په لګښت جوړ او ګټه اخیستنې ته وسپارل شو.»
د هلمند شمالي ولسوالیو اوسېدونکي دغه راز وايي، د دې سړک او پله جوړېدو سره به مرکز لښکرګاه ته د دوی لار لنډې شي، په کرنه، سوداګرۍ او اقتصادي چارو کې به له دوی سره مرسته وکړې.
د هلمند اوسېدونکی حکمت الله وايي: « زموږ له کوره تر لښکرګاه ښار پورې ۱ کیلو مټر لاره هم نه ده، خو د پله نه شتوالي له امله به موږ شل کیلومټره واټن د بولان له لارې واهه ترڅو لښکرګاه ته ورسېږو.»
د هلمند اوسېدونکی عطا الله وايي: « پخوا به موږ په بولان باندې راګرځېدو، یو تر دوه ساعتونو به د لښکرګاه پل د ګڼه ګوڼې له امله بند و. موږ له دې امله ډېر سخت په تکلیف یو.»
د هلمند اوسېدونکی وکیل احمد وايي: «موږ د باباجي لارې له جوړېدو سره ډېرهوسا یو. که دا پل هم جوړ شي، دا به د خلکو لپاره ډېرې اسانتیاوې رامنځته کړي.»
هلمند مرکز لښکرګاه کې د کلونو راهیسي پرهلمند سیند یو پل موجود دی او د زیاتو ولسوالیو د اوسېدونکو د تګ راتګ لار ده. دغه لار ډیری مهال د زیات بیروبار له امله بنده وي، خو د یاد سړک او پل له جوړېدو سره به ټرافیکي ګڼه ګوڼه کمه او خلک به ژر کارونو ته ورسېږي.
