جرمني له پاکستان څخه د هغو افغانانو د انتقال پرېکړه تایید کړه چې د دې هېواد له لوري يې د کډوالۍ لپاره غوښتليکونه منل شوي.
رویټرز خبري اژانس د جرمني بهرنيو چارو وزارت چارواکو له قوله راپور ورکړی چې برلين د قانوني او ډېپلوماټيک فشار په پايله کې د شاوخوا ۲ زره افغانانو د انتقال پروسې ته مثبت ځواب ورکړی.
په راپور کې راغلي، له پاکستان څخه جرمني ته د دغو افغانانو د ایستلو بهير وروسته له هغې بېرته پيل کېږي چې د سپټمبر له لومړۍ نېټې وروسته اسلام اباد د شاوخوا درې ميليونه نورو افغان کډوالو جبري اخراج لړۍ پيلوي.
د جرمني بهرنيو چارو وزارت کې یوې سرچينې رویټرز ته ویلي: « له پاکستانه جرمني ته د انتقال په پروسه کې د دې افغانانو د اسنادو ارزونه په بېلابيلو پړاوونو کې قرار لري چې د ارزونې لپاره يې مسلکي پرسونل استول شوی.»
له دې وړاندې د جرمني حکومت له اسلام اباد غوښتي و چې افغانستان ته د ايستل شويو افغان کډوالو په بهیر کې شاوخوا۴۰۰ هغو افغانانو ته په پاکستان کې د لنډمهالې مېشتېدنې فرصت برابر کړي چې جرمني ته يې د تګ لپاره اسناد تایيد شوي دي.
د نړیوالو اړیکو شنونکی نجیب الرحمن شمال وايي: « جرمني ژمنه کړې چې په هغو تعهداتو به عمل کوي چې له دې وړاندې یې کړي او هغه کسان به جرمني ته انتقال کړي چې د پناه غوښتنې اسناد یې منل شوي. دغه پروسه به د جرمني د هغه پروګرام په چوکاټ کې عملي شي چې د کابل لوفتبروکه په نوم پيل شوې وه. د دې پروسې له مخې به هغه افغانان انتقال شي چې په پاکستان کې دېره دي.»
د کډوالو د حقونو مدافع علي رضا کریمي وايي: « په دې سره به لا ډېرې کورنۍ نجات پیدا کړي او آرام ژوند به ولري. دا ډول منل هم انساني دنده ده او هم نړیوال مسوولیت دی.»
ځینې نور شنونکي په نړيواله کچه د هېوادونو اقتصادي او پوځي قدرتونو ته په اشارې د کډوالۍ په برخه کې د دوی چلن هم توپيري بولي. دوی زياتوي، هر هېواد د خپلو سياسي او اقتصادي ګټو له مخې د کډوالۍ پاليسي تعقيبوي چې ډېر کله د کډوالۍ له نړيوالو قوانينو سره په ټکر کې وي.
د نړیوالو اړیکو شنونکی سمیر انګار وايي: « باید افغان کډوالو سره همکاري وکړي، ترڅو د هغوی کارونه ژر ترسره شي او خپلو اهدافو ته ورسيږي. که دا ډول کارونه ادامه ولري، په سیمه کې د پاکسان حیثیت هم زیانمن کېږي.»
په ورته مهال، جرمني افغانستان ته د هغو افغانانو د اخراج لړۍ هم پيل کړې ده چې په دې هېواد کې یې په بېلابېلو جرمونو لاس پورې کړی.
د دې لړۍ په ترڅ کې تر دې دمه دوه ځلې لسګونه افغانان د قطر او ازبېکستان په منځګړيتوب افغانستان ته را وړل شوي دي.
