د کندهار ښاروالۍ له لوري په ښار کې د برېښنا کوټ په نوم د یوه مهم سړک د پراخولو چارې پیل شوې.
چارواکي وايي، دا سړک د ۷۰ میلیونو افغانیو په لګښت جوړیږي چې د اروزګان ولایت او د کندهار شمالي ولسوالۍ به له کندهار ښار سره ونښلوي.
دوی زیاتوي چې د دې سړک جوړولو د لومړي فاز چارې به د روان لمریز کال تر پایه بشپړې شي.
د کندهار ښاروالۍ ویاند سیف الله عاصیم وايي: « دا سړک چې د اروزګان ولایت ترڅنګ د کندهار شمالي ولسوالۍ هم له کندهار ښار سره وصلوي، تقریبا ً ۷ کیلومټره اوږدوالی لري. دا سړک د برېښنا کوټ له پله پيل تر کوتل مورچې پورې جوړېږي. د دې سړک پلنوالی مخکې ۳۰ متره و، خو تېر کال کندهار ښاروالۍ دا سړک پراخ کړ او تر ۴۰ مترو ورسېد. د دې سړک په مسیر کې چې کوم دوکانونه او کورونه ودان وو، تېر کال ویجاړ شول او سږ کال یې دا دی د اساسي رغونې چارې پيل شوې. له برېښنا کوټ پیله څخه پيل تر زړې هډې پورې چې تقریبا ً ۲.۵ کیلومټره کېږي، سږ کال په پلان کې ده چې په اساسي او معیاري توګه ورغول شي.»
د کندهار ښاروالۍ د ودانیزو چارو مدیرانجینر ولي شاه خاکسار وايي: « دا سړک به له نړیوالو معیارونو سره سم په اساسي توګه د ۴۰ مترو په عرض باندې جوړ شي. په لومړیو کې د ختیځ په طرف د ۲۰ مترو په عرض پراخېږي او په نږدې راتلونکي کې به یې د لوېديځ طرف کارونه هم د ۲۰ مترو په عرض پيل شي.»
په ورته مهال، د کندهار او اروزګان ولایتونو اوسېدونکي وايي، د دې سړک رغونه به نه یوازې د دوی ټرانسپورټي ستونزې حل کړي، بلکې د سوداګرۍ، کرنیزو محصولاتو او ورځنیو توکو د چټک او خوندي لېږد لپاره به هم اسانتیاوې برابرې کړي.
د اروزګان اوسېدونکی قاري خان محمد وايي: « موږ به چې دلته راتلو، په دې سیمه کې به ډېر سخت بیروبار و، له ډېرو کسانو سره به عاجل ناروغان هم وو، خو د ګڼې ګوڼې له امله مو هدف ته ځان نه شو رسولی.»
د کندهار اوسېدونکی نصیب الله وايي: « د دې سړک په پراخېدو سره به د ټکرونو مخه ونیول شي، ځکه دا سړک کوچنی و او په هغو ورځو کې به ډېرې ټرافیکي پېښې کېدلې چې د اختر په څېر به ملی مناسبتونه وو.»
د کندهار یو بل اوسېدونکی احمد الله وايي: « د دې سړک رغېدل او پراخېدل به خلکو ته ډېرې اسانتیاوې رامنځته کړي؛ په ځانګړې توګه به د اروزګان ولایت او شاه ولیکوټ ولسوالۍ خلک ډېر هوسا شي. د ښاروالۍ له مسوولینو غوښتنه کوو چې هغو سړکونو ته هم پاملرنه ډېره کړي چې کارونه یې نیمګړي پاتې دي.»
دا په داسې حال کې ده چې د ښاروالۍ د مسوولینو په خبره، نږدې وخت کې به د کندهار ښار د څو نورو مهمو سړکونو د پراخولو چارې هم پیل شي.
