د هرات ولایت د کانونو او صنایعو خونې مسوولین وایي، له ګاونډیو هېوادونو د راستنو شویو کسانو له ډلې، له ۶ زرو ډېرو هغو ته د دې ولایت په صنعتي ښارګوټي کې د کار زمینه برابره شوې ده.
دوی زیاتوي، که حکومت صنعتکارانو ته ځمکه او د برېښنا اسانتیاوې برابرې کړي، له ۱۰۰ زرو ډېرو نورو کسانو لپاره به هم د کار زمینه برابره کړي.
د هرات کانونو او صنایعو خونې رییس عبدالناصر امین وايي: « موږ د صنعتي ښارګوټي په څلورم او پنځم فاز کار پیل کړی او فابریکې په کې جوړېږی. زه ډاډ ورکوم، که صنعتکارانو ته ځمکه او برېښنا په واک کې ورکړل شي، موږ کولی شو ۱۰۰ زره نور کسان له ځان سره ونیسو. راستنېدونکي افغانان دې مطمئن اوسي چې دلته د کار زمینه شته او موږ کسان نیسو.»
په کار ګومارل شوي کسان د کاري فرصتونو له برابرېدو هرکلی کوي، خو ټینګار کوي چې په کوردننه دې پانګونه زیاته او خلکو لپاره دې کاري زمینه پراخه شي.
له ایرانه راستون شوی میرویس وايي: « په هېواد کې پانګونه کول د ځوانانو لپاره ډېره ښه ده ، ځکه دوی به د ایران په څېر هېوادونو ته له ورتګ خلاص شي. دا موږ ته د ویاړ ځای دی چې په خپل وطن کې کار وکړو او د آبادۍ برخه شو. زه له هغو سوداګرو ډېر خوښ یم چې هرات ولایت کې کارخونې جوړوي.»
له ایرانه راستون شوی محمد یونس وايي: « ډېر به ښه شي، که دا پانګه وال دلته پانګونه وکړي، ځوانانو ته کار پيدا کېږي او بېکاري کمېږي.»
ځايي مسوولان تازه د راستنو شویو لپاره د کاري زمینې برابرولو خبر داسې مهال ورکوي چې د دې ولایت د چارواکو په خبره، د برېښنا ستونزې د هواري او هلته د پانګونې لپاره د لا غوره فرصتونو برابرېدو په موخه د بادي او لمریزې برېښنا پروژې پیل شوې دي.
د هرات والي ویاند محمد یوسف سعیدي وايي: « د افغانستان اسلامي امارت د هرات محلي اداره په دې ولایت کې د برېښنا ستونزې هوارولو لپاره پرله پسې هڅې کړې او دا مهال د برېښنا د تولید په څو پروژو کار روان دی. دغه راز د بادي، آبي، ګازي، ذغالي او لمریزې برېښنا د تولید په برخه کې د هرات له ظرفیت ګټې اخیستنې لپاره هم کار روان دی، ترڅو د هرات خلکو او په ځانګړي توګه د صنعتي ښارګوټي د برېښنا ستونزه هواره کړو.»
د هرات د صنایعو او کانونو خونې د شمېرو له مخې، اوس مهال د دې ولایت په صنعتي ښارګوټي کې شاوخوا ۱۱۶۰ کارخونې فعالیت کوي او شاوخوا ۱۵۰ زره کسان په کې پر کار بوخت دي.
