په پاکستان کې د افغانانو اړوند ټرانسپورټي شرکتونو استازي کابل ته راغلي او ورسره په یاد هېواد کې د کېدونکي ناسم چلن او بې عدالتۍ له امله شکایت کوي.
دوی وايي، پاکستان د افغانانو هغه ټرانسپورټي لارۍ درولې دي چې نمبر پلېټ يې د دې هېواد دی او افغان موټر چلوونکي ته یې د چلولو اجازه نه ورکوي.
د دوی په خبره، دغه ټرانسپورټي لارۍ چې د افغانانو مکلیت دی، پخوا به يې د وېزې په اخیستلو سره د افغانانو له لوري چلول کېدې، خو اوس پاکستان دا حل لاره نه مني او په يوه او بله پلمه يې له افغانانو ستنول غواړي.
د ټرانسپورټي شرکتونو استازی حاجي فرمان ګل شینواری وايي: « یوه میاشت وړاندې د پاکستان له لوري دا امر راغی چې په پاکستاني موټر کې باید پاکستانی ډرېور وي. همدارنګه هغو ډرېورانو ته یې هم اجازه نه ورکوله چې د پاکستان وېزه یې درلوده. دا لارۍ زموږ خپلې دي، ملکیت زموږ دی، خو یوازې پلټ یې د پاکستان دی. موږ یوازې د کراچۍ له بندر تر کارخونو پورې ۳۴ زره روپۍ ټول پلازه د پاکستان حکومت ته ورکوو. موږ د پاکستان له حکومت غواړو چې زموږ لاریو د تګ راتګ اجازه وکړي.»
د ټرانسپورټي شرکتونو یو بل استازی نور نظر شینواری وايي: « پاکستان په خپلو ټولو بندرونو کې هغه لارۍ ایسارې کړې دي چې ملکیت یې د افغانانو او نمبر پلټ یې پاکستانی دی.»
په پاکستان د افغانانو په مالکيت د ټرانسپورټي شرکتونو استازي وايي، د دغو درول شویو لاریو شمېر ۲۰ زرو ته رسېږي چې د افغانانو ملکیت دی، خو یوازې نمبر پلیټ یې د پاکستان دی.
د دوی غوښتنه دا ده چې باید د سیاسي فشار وسیله ونه ګرځي او پاکستانی لوری باید ورته ستونزې جوړې نه کړي.
د ټرانسپورټي شرکت استازی حاجي ظاهر الله ظاهر وايي: « زموږ د مالوماتو له مخې، یوازې د شینوارو له ۵ زرو ډېرې لارۍ دي چې پاکستاني پلېټونه لري او د هرې یوې قیمت له ۱۰ میلیون تر ۳۰ میلیون پاکستانۍ کالدارو پورې دي. که دا رقم د ټول افغانستان په سطحه اټکل شي، تر ۲۰ زرو زیاتې لارۍ زموږ په پاکستان کې چلېږی. د دوی پلان دا دی چې په پاکستان کې د افغانانو له خوا پېرل شوې لارۍ ودروي یا یې پاکستانیانو ته ورکړي. دوی په دې سره خپل خلکو ته کار او وړیا سرمایه په لاس ورکوي.»
په ورته مهال، د افغاستان او پاکستان د سوداګرۍ ګډه خونه په ټرانسپورټ کې د پاکستان له لوري دا رامنځته شوې ستونزه مني، خو وايي د حل لپاره يې هڅې پیل کړي.
د افغانستان او پاکستان د سوداګرۍ ګډې خونې رییس نقیبالله ساپی وايي: « یو تعداد لارۍ داسې هم دي چې مالک یا ډرېور یې افغان دی خو لارۍ پاکستانی پلېټ لري. د دې خلکو د وېزو ستونزه وه چې موږ له مسوولینو سره شریکه کړې، د حل لاره هم ورته پيدا شوي او موږ ته ژمنه راکړل شوې چې دا ستونزه به ژر تر ژره حل شي.»
په ورته مهال، د صنعت او سوداګرۍ وزارت وايي، موده وړاندې یې د توکو پر ټرانزیټ او همدا راز د سوداګرۍ او ټرانزیټ د لا پراختیا لپاره له پاکستان سره هوکړې کړې دي.
د صنعت او سوداګر وزارت ویاند اخند زاده عبدالسلام جواد وايي: « د ټرانزیټي تسهیلاتو، فني ټیمونو جوړولو او تجارت د پراختیا لپاره د دواړو خواوو ترمنځ رغنده تفاهم رامنځته شوی.»
د نورو برخو ترڅنګ، په سوداګرۍ او ټرانزیټي برخو کې هم پاکستان تل له افغانستان سره دوه مخی چلن کوي او دا هېواد تل د افغانستان ټرانسپورټ او محصولاتو د ټرانزیت پر وړاندې ستونزې جوړې کړې دي چې له امله یې پر موټرو کې بار د افغانستان کرنیز تولیدات او میوې خرابې شوې او یاهم پر وخت بازار ته نه دي رسېدلي.
