متقاعدینو ته د دوی د مالي امتيازونو ورکړې لپاره د ځانګړې محکمې جوړولو په اړه د اسلامي امارت د رهبر له فرمان ۹ میاشتې وروسته، تازه مالیې وزارت اعلان کړی چې د بېلابېلو ادارو متقاعدینو ته د هغوی د حقوقو ورکولو لړۍ یې د دوشنبې په ورځ پيل کړه.
سلګونه متقاعدین له دې اعلان وروسته د تقاعد امتياز ترلاسه کولو لپاره کابل کې د ماليې وزارت د خزانې ریاست مخې ته راټول شوي او د حکومت وروستۍ پرېکړې په اړه د خوښۍ ښودلو ترڅنګ، د تقاعد ژر ورکړې غوښتنه کوي.
متقاعد دولتي کارکوونکی احمد مایار وايي:« اوس دا دی تقاعد اجراء کېږي. دلته هر متقاعد ۴۵ کاله کار کړی او د خپلو حقونو غوښتنه کوي. موږ له حکومت غوښتنه کوو چې دا پروسه جدي او چټکه کړي، ځکه چې وخت ډېر وتلی او خلک سخت محتاج دي.»
متقاعد سید عباس وايي:« له اسلامي امارت غوښتنه کوم چې د خلکو دا مسلم حق ژر تر ژره ورکړي، ترڅو له ستونزو خلاص شي.»
ځينې نور متقاعدین وایي، څلور لسیزې یې د هېواد او خلکو په چوپړ کې تېرې کړې او تېرو څلور کالو کې د تقاعد نه ترلاسه کولو له امله سختو اقتصادي ننګونو سره مخ شوي دي.
دوی له مالیې وزارت غواړي چې د تقاعد حقونه یې ژر ورکړي.
متقاعد عبدالخالق وايي: « باید هر وزارت ته په دوه، درېیو تر پنځو ورځو پورې تقاعد اجراء شي او ټولو ته خپل حق ورکړل شي، دا به ډېر د خوښۍ ځای وي.»
متقاعد حامد وايي: « که حکومت همکاري وکړي او مرسته وکړي چې زه خپل حقوق واخلم او د ناروغۍ درملنه مې وکړم، دا به ډېر ښه شي. څلور کاله کېږي په دې حقوقو پسې سرګردانه یو.»
د مالیې وزارت د يوې خبرپاڼې له مخې، د متقاعدینو لپاره د اسانتیاوو رامنځته کولو په موخه به د ملکي او نظامي متقاعدینو معاش له منظم مهالوېش سره سم، د تقاعد ځانګړې محکمې او اړوند څانګو سره په همغږۍ ورکړل شي.
له دې سره سم، د مالیې وزارت د تقاعد د خزینې رییس وایي، دا مهال ۱۵۰ زره متقاعدین د حکومت له لوري تثبیت شوي دي.
د مالیې وزارت د تقاعد خزینې رییس مولوي محمد رحماني وايي: « اوله کټه ګوري چې همدا اوس پیل شوې، د هغو متقاعدینو ده چې تثبیت شوي دي، اسناد او سوانح یې د تقاعد په نامه راغلي دي. د دغو کسانو شمېر شاوخوا ۱۵۰ زره تنه دي.»
د ماليې وزارت د مالوماتو له مخې، په لومړي پړاو کې به د یوې میاشتې په موده کې د سټنډرډ ملي ادارې، پېښو ته د رسېدنې او چمتووالي ملي ادارې، د بدني روزنې او ورزش ادارې، پاسپورټ عمومي ریاست، د شهیدانو او معلولینو چارو وزارت، د اداري اصلاحاتو او ملکي خدمتونو خپلواک کمیسیون، د چاپېریال ساتنې ملي ادارې، د ارګ د ساتنې عمومي ریاست، د ملي امنیت شورا دفتر او اقتصاد وزارت متقاعدینو ته خپل حقوق ورکړل شي.
د مالیې وزارت د تقاعد د خزینې رییس زیاتوي، د پاتې ادارو د متقاعدینو د حقونو ورکړې مهالوېش به هم د روانې وږي میاشتې پر ۲۵مه اعلان شي.
د مالیې وزارت د تقاعد خزینې رییس په دې اړه وايي: « ادارې معلومې دي او هره اداره به په خپل نوبت، ټاکل شوې نېټې او ورځې کې د ادارې نماینده او متقاعدین راځي او حقوق به اخلي. کله چې دا خلاص شي، بیا به بله اداره پيل کېږي.»
د چارو کارپوهان بیا د هېواد روان وضعیت ته په کتو د حکومت دغه پرېکړه ستایي او غوښتنه کوي چې دغه لړۍ دې نوره هم چټکه کړي.
