تحریک طالبان پاکستان(ټي.ټي.پي) په ملګرو ملتونو کې د پاکستان استازي عاصم افتخار احمد د وروستيو هغو څرګندونو او ادعاوو ته غبرګون ښودلی چې کواګې یاد تحریک د خپلو عملیاتو لپاره د افغانستان له خاورې ګټه اخلي.
ټي.ټي.پي په دې اړه یوې اعلامیه کې د نوموړي یاد تورونه په کلکه رد کړل او د دې هېواد ریاست یې د پروپاګند او ناسمو مالوماتو په خپرولو او د یاد سازمان په تېر ایستنې تورن کړ.
د اعلامیې یوه برخه: « د پاکستان ریاست له اوږدې مودې راهیسې په سیمه ییزه او نړیواله کچه داسې پروپاګند روان کړي چې د ټي.ټي.پي مجاهدین د افغانستان له خاورې په ګټنې په پاکستان کې عملیات کوي او بېرته یاد هېواد ته وراوړي؛ خو د پاکستان خلک او نړۍ په دې ښه پوهېږي چې دا پروپاګند هېڅ ډول اعتبار نه لري.»
ټي.ټي.پي په دې اعلامیه کې پاکستان پر دې ننګولی چې د ډیورند فرضي کرښې په اوږدو کې د اغزن سیم او د کلکو امنیتي تدابیرو له نيولو سربېره څنګه امکان لري چې د تحریک طالبان پاکستان غړي دې ور واوړي.
اعلاميه کې ويل شوي، پاکستان له تېر وخت راهیسې دا هڅه کوي چې په دې ډول ناسمو او له حقیقته لرې څرګندونو ملګري ملتونه وغولوي او په دې پلمه د تېر په څېر له دې سازمان سیاسي او امنیتي ګټه پورته کړي.
تحریک طالبان پاکستان د عاصم افتخار احمد د ادعاوو د پوره څېړنې لپاره د ملګرو ملتونو له لوري په بې طرفه ډول د څېړنو غوښتنه کړې.
د تحریک طالبان پاکستان اعلامیه په دې اړه وايي: « موږ په جدي ډول له ملګرو ملتونو او د دې سازمان له پیاوړو غړیو چې پر حقایقو ولاړو مالوماتو باور لري؛ غواړو چې د څېړنیز ټیم په ګومارلو سره په بې پرې ډول د پاکستان د استازي څرګندونې وڅېړي او د پاکستان پوځي او امنیتي ادارو ته دا موقع برابره نه کړي چې د خپلو غولوونکو مالوماتو پر اساس یو ځل بیا د ملګرو ملتونو له سازمان سیاسي او امنیتي ګټه پورته کړي.»
واک ته د اسلامي امارت له رسېدو سره هم مهاله د پاکستان پوځي او سیاسي چارواکي په مکرر ډول تورونه پورې کوي چې د افغانستان حکومت یې له خپلو مسوولیتونو د دوی تېښته او بې اساسه ادعاوې بولي.
د سیاسي چارو کارپوهان په یاده برخه کې د پاکستان د تورونو لړۍ د اسلام اباد اساسي پالیسي ګڼي چې په نړیوالو سټېجونو کې د افغانستان د رسمي استازي له نه شتوالي ناسمه ګټه پورته کوي.
د سیاسي چارو شنونکی واحد فقیري وايي: « دا د پاکستان پالیسي ده چې باید یو څوک ملامت کړي. د ټي.ټي.پي په اړه پر افغانستان او طالبانو تور لګول د پاکستان په الزاماتو کې یو دود ګرځېدلی او لامل یې دا دی چې پاکستان پوهېږي افغانسان په نړۍ کې منزوي دی او هېڅ ځای داسې استازی نه لري چې د ځان دفاع وکړي، نو له همدې امله غواړي خپل تور لاسونه په افغانستان پاک کړي. دا په داسې حال کې ده چې موږ ټول پوهېږو د پاکستان مشکلات داخلي دي، له خپلو خلکو، پښتنو، بلوڅو او نورو اقلیتونو سره ستونزې لري، خو نه غواړي چې دا واقعیتونه ومني.»
دا داسې مهال ده چې په ملګرو ملتونو کې د پاکستان دایمي استازي عاصم افتخار احمد تېره اونۍ ٬٬له ترهګرۍ د نړۍ سولې او امنیت ته د ورپېښو ګواښونو،، تر سرلیک لاندې د ملګرو ملتونو امنیت شورا په ناسته کې تور پورې کړی چې ګواکي د داعش خراسان ډلې په شمول، ټي.ټي.پي، بلوڅ آزادي غوښتونکي او د مجید برېګېډ وسله والې ډلې په افغانستان کې فعالانه حضور لري او له هغه ځایه په پاکستان کې بریدونه کوي.
هغه تورونه او ادعاوې چې د افغانستان حکومت هم په خپلو غبرګونونو کې په کلکه رد کړي دي.
