د اسلامي امارت لوړ پوړو چارواکو د خپلواکۍ ۱۰۶ کالیزې په نمانځغونډه کې یو ځل بیا د عصري زده کړو پر ارزښت ټینګار وکړ.
د ریاست الوزرا اقتصادي مرستیال غونډې ته خبرو کې وویل، له اوسنۍ عصري نړۍ سره د سیالۍ په موخه باید افغانان عصري زده کړو ته مخه کړي او له پرمختللیو وسایلو سره بلد شي.
ملاعبدالغني برادر اخوند په خپلو خبرو کې زیاته کړه، باید د عصري وسایلو پر مټ دوښمن ته د نوک ځواب په سوک او د مرمۍ بیا پر میزایل ورکړو.
برادر زیاته کړې:« د دې ګټلي انقلاب د ساتلو لپاره د درانه قیمت د پرې کولو پر ځای، باید د عصر د غوښتنو مطابق عصري زده کړو ته مخه کړو، د ټېکنالوژۍ او عصري وسایلو خاوندان شو، دوښمن ته د نوک ځواب په سوک او د مرمۍ ځواب په میزایلو ورکړو.»
د اسلامي امارت لوړ پوړو چارواکو همدارنګه پر ګاونډ، سیمې او نړۍ هم غږ وکړ چې د افغانستان په اړه نور باید سرچپه خوبونه ونه ګوري.
د دوی په خبره، افغانستان اوس متحد دی او له کلونو وروسته تر واحد قيادت لاندې اداره کېږي.
د ریاست الورزا اقتصادي مرستیال په دې اړه وايي: « دا ملت اوس څوک اسیر نه شي نیولی، د لاسوهنې او تقابل پر ځای د اصولو په چوکاټ کې هر اړخیز سیاسي او اقتصادي تعامل ته لاره هواره کړي.»
د بهرنیو چارو وزیر مولوي امیرخان متقي وايي: « اوس که ګاونډیو هېوادونو کې څوک وي، که د سیمې په هېوادونو کې څوک وي او که په نوره نړۍ کې وي، د افغانستان لپاره د چپه خوبونه نه ویني؛ افغانستان اوس متحده دی او له ډېرو تجربو وروسته یې یو ډېر ښه نظام جوړ کړی.»
ټاکل شوې د روانې میاشتې په پای کې د افغانستان په تړاو د پاکستان په کوربه توب یوه غونډه راوبلل شي.
د بهرنیو چارو وزیر بیا په ګاونډ او سیمه کې د افغانستان په تړاو جوړېدونکو غونډو ته په اشارې وايي، هېڅوک دې افغانستان ته په سپکه نه ګوري.
د بهرنیو چارو وزیر په دې اړه زیاتوي: « دا چې یو ځای او بل ځای غونډې کوي او زموږ خواته کاڼي راولي، هغوی ته به د عبدالرحمان بابا دا بیتونه کافي وي چې وايي:
ته چې بل په غشو ولې هسې پوه شه
چې همدا غشي به ستا په لور ګوزار شي
کوهي مه کنه د بل سړي په لار کې
چېرې ستا به د کوهي په غاړه لار شي
چا چې زموږ په اړه بدې ارادې لرلې دي، الله(ج) په تاریخ کې ذلیل کړي او له دې وروسته به یې هم ذلیله کوي.»
د اسلامي امارت چارواکو همدارنګه په خپلو خبرو کې له نړیوالو سره د ښو اړیکو پاللو ډاډ ورکړ او له نړۍ سره یې پر ښو اړیکو ټینګار وکړ.
دوی همدارنګه د خپلواکۍ د ۱۰۶مې کالیزې په مناسبت وايي، نوی نسل باید د خپلو تېرو بریو پر پل قدم کېږدي او مثبته زده کړه ترې وکړي.
د حکومت وياند هم په دې اړه یوه خپره کړې اعلامیه کې ویلي، په تېره یوه پېړۍ کې د درېیو سترو زبرځواکو ماتول د ولس ایماني هوډ او غيرت څرګندونه کوي.
