بغلان غرنی موقعیت او ځای نیم ځای د خامو لارو لرونکې ولسوالۍ لري او له امله یې د اور وژنې پر وړاندې چټکه رسېدنه نه شي کېدای، حال دا چې امنیتي چارواکي دې ولایت کې د اور وژنې پېښو ته رسېدنه بریالۍ ګڼي.
د بغلان امنیې قوماندانۍ د اور وژنې آمریت مسوولین د پېښې ځای ته پر وخت د رسېدنې ترڅنګ، د څه کم څلور کالو په لړ کې يې د دې ولایت په مرکز او اړوندو ولسوالیو کې شاوخوا ۲۳۰ د اور لګېدنې پېښې مهار کړې دي.
د بغلان امنیې قوماندانۍ د اور وژنې آمر شېر احمد برهاني وايي: « په تېرو درېیو کالو کې مو ۲۰۳ د اور لګېدنې پېښې مهار کړې دي. په ټولیزه توګه تېرو درېیو کالو کې د ۱۴۴ میلیونو او ۸۰۰ زرو افغانیو په ارزښت توکي د اور له خطر هم ژوغورل شوي دي.»
مسوولین وايي، د اور لګېدنې د دغو پېښو له ډلې ۸۶ په استوګنیزو کورونو، ۸۱ یې د نقلیه وسایطود د پرزو پلورلو په دوکانونو او ۳۶ یې په نورو ځایونو کې شوې دي.
که څه هم په دې ولایت کې د اور وژنې پېښې مهار شوې دي یا هم د اور وژنې ډله ور سېدلې، خو د سیمې اوسېدونکي یاده برخه کې د وسایلو له کموالي شکایت کوي او وايي، نه شي کولی لرې پرتې سیمې تر پوښښ لاندې ونیسي.
د بغلان اوسېدونکی امير آغا قرباني وايي: « موږ د بغلان ولایت د اور وژنې یا اطفایې له کارونو خوښ یو، خو غوښتنه لرو چې خپل خدمات ولسوالیو او کلیو ته هم پراخ کړي.»
د بغلان اوسېدونکی مصطفی لطیفي وايي: « موږ له حکومت غوښتنه کوو چې د بغلان اطفایې د امکاناتو او تجهیزاتو په برخه کې لا ډېره همکاري وکړي، ترڅو د اور وژنې پېښو ته په چټکۍ سره ځان ورسولی شي.»
د بغلان اوسېدونکي او ښاریان د اور وژنې برخه کې یوازې د وسایلو نه بلکې د ظرفیت لوړولو او پرسونل ډېرولو غوښتنه هم کوي چې په خبره يې د پېښو په مخنیوي کې به خلک له ډېر زیان وژغورل شي.
