امریکا وایي، افغانستان کې سولې ته د رسیدو لپاره قوي اراده لري او د همدې لپاره یې خلیلزاد ټاکلی چې نظرونه همغږي کړي.
کابل کې د امریکا سفیر له افغان چارواکو سره په ګډه غونډه کې د سولې پروسه کې د افغان مېرمنو هڅې وستایلې.
اجرایه رییس د سولې وروستۍ هڅې هیله بښونکي یادې کړي او تمه یې ښودلې چې افغانان سولې ته نږدې شوي دي.
د سولې پروسې لپاره د افغان حکومت او امریکا ښکاره هڅو د دې پروسې بریا ته تمې زیاتې کړي، خو تراوسه د طالبانو له لوري داسې حرکت نه دی شوی چې دا خوبونه په رښتیا بدل کړي.
امریکا چې د جګړې او سولې اړخ یادیږي، اوس ټینګار کوي چې د سولې لپاره د قوي ارادې ښودلو لپاره یې خلیلزاد ټاکلی چې همغږي رامنځ ته کړي.
کابل کې د امریکا سفیر جان باس داسې ویلي ((په افغانستان کې سوله د امریکا یو له مهمو لومړیتوبونو ده. موږ په دې تړاو دننه هېواد کې او له هیواده بهر هم د خلیلزاد په واسطه هڅې پيل کړي دي. موږ ډېر لېواله یو چې د دې هېواد لپاره یو سولییز راتلونکی ووینو.))
اجرایه رییس هم چې د غونډې ویناوال و، د سولې وروستۍ هڅې یې هیله بښونکي یادې کړې او تمه یې وښوده چې افغانان سولې ته رسیدونکي دي.
له دې سره یو ځای د سولې عالي شورا مرستیالې نیوکه وکړه چې لا هم دولتي ادارو کې ښځو ته د پام وړ ونډه نه ده ورکړل شوې او په دې برخه کې لا ډيرو هڅو ته اړتیا ده.
د سولې پروسې د بریا لپاره حکومت د سولې عالي شورا تر څنګ د سه شنبې په ورځ د سولې عالي مشورتي بورد هم اعلان کړ چې نهه کمېټې او بیلابیلې سیاسي، جهادي او مخور کسان پکې شامل دي.
عالي مشورتي بورد به له طالبانو سره د مخامخ خبرو لپاره چمتووالي نیسي او د دې بورد مشري به افغان ولسمشر کوي.
