د خوست ښاروالۍ له خوا د پلو لارو جوړولو دا پروژه چې د ښار په لومړۍ او څلورمه ناحیه کې پلې کېږي، نږدې ۱۲ ميليونه افغانۍ لګښت پرې راځي چې په بشپړېدو سره به يې ښاريانو ته د تګ راتګ پرمهال ګڼې اسانتياوې برابرې شي.
د مسوولینو په خبره، په نږدې راتلونکي کې به خوست ښار کې د ورته نورو پلو لارو د جوړېدو چارې هم پيل شي.
خوست ښاروال شهزاد نور راشد وايي: « خپله هڅه کوو او کوشش مو پيل کړی دی. تېر کال مو هم د دولتي ادارو شاوخوا پياده روونه جوړ کړل او سږ کال هم کارونه روان دي. راتلونکو څو ورځو کې به د ښار پیاده روونه او د مارکېټونو مخې هم جوړې کړو.»
په ورته مهال، خوست ښاريان وايي، دا مهال په ښار کې دننه زياتره پلې لارې خرابې دي چې له امله یې ګڼې ستونزې رامنځته شوې.
سره له دې چې ښاریان د دغو لارو جوړول د ګڼو اسانتیاوو رامنځته کولو لپاره مهمې بولي، ترڅنګ یې زیاتوي چې ورسره به ښاري ښکلا هم زیاته شي.
د خوست ښار اوسېدونکی محمد الرحمن وايي: « دا ډېره لویه اسانتیا ده چې ښار او سړکونه پياده روونه ولري، د اوبو لپاره لښتي ولري، له دې سره ډېرې ستونزې حل کېږي. که پیاده رو ښکلی او صفا وي، ښار ورسره ښایسته کېږي.»
د خوست ښار اوسېدونکی سیف الرحمن وايي: « دلته چې هر ښاروال او هر نظام راځي، په دې یوه سړک یې څلور پنځه ځله مصرف کړی. دا د خلکو او ولسونو پیسې دي، باید سمې مصرف شي.»
که څه هم په وروستیو کالونو کې د نویو پروژو په تطبیق سره د خوست ښار په بڼه کې مثبت بدلون لیدل کېږي، خو د منظمو پلو لارو نه شتوالي ترڅنګ د ټرافیکي ګڼه ګوڼې د اساسي حل په برخه کې لاهم جدي ستونزې پر خپل ځای پاتې دي.
