د بلخ ولایت مزار شریف ښار د پراخوالي او ښاري استوګنې لپاره د نوي ښار پروژې د اسنادو ورکړې لړۍ پیل شوه.
مسوولین ډاډ ورکوي چې دغه استوګنیزه پروژه کې هېڅ ډول ستونزه نه شته او ښاریان دې په ډاډه زړه ورته راشي.
د مزار نوي ښار پروژې ساحوي انجینر جمال الدین میرزایي وايي: « دلته چې کومه ځمکه خرڅېږي، خپله د مالک له خوا یې پلورل کېږي او دا هغه کسان دي چې په ۱۳۰۱ کال کې یې دا ځمکه قباله کړې چې ځینې یې زر خرید او ځینې نورې خاک بدل دي، هېڅ ډول حقوقي ستونزه نه لري او خپله مالکان یې شته دي.»
د بلخ مرستیال والي نورالهادي ابو ادریس وايي: « نن د دې پروژې د پرانستې لیدونکي یو. دا د بلخ ولایت لپاره یوه مهمه لاسته راوړنه ده. په دې پروژه کې داسې مدرسې دي چې د اوزبېکستانیانو له خوا جوړې شوې او دغه راز له پوهنتون او ښوونځیو نیولې تر هرڅه پورې امکانات لري.»
ځايي چارواکي خبر ورکوي چې د نوي ښار پروژې ټولې حقوقي ستونزې حل شوې او په رسمي بڼه يې د ځمکو اخیستونکو ته د شرعي قبالو د وېش لړۍ پیل کړې ده.
بله خوا، یو شمېر سوداګر د ښار په شاوخوا کې د ورته ښارګوټو پرانیستل په ښار کې د ګڼې ګوڼې کمولو، سوداګرۍ او ښاري مېشتېدنې لپاره خورا مهم بولي.
د بلخ ولایت مقام د دفتر رییس مولوي فضل الربي فضلي وايي:« که په دې شهرک کې چا د شخصي ځمکې دعوه لرله هم په اړه یې فیصله شوې او خپل ځایونه به ورکول کېږي. همدارنګه که د دولتي ځمکو ستونزه وه، هغې لپاره هم حل لارې شته او شهرک به نور هېڅ ستونزه ونه لري.»
سوداګر اسدالله اسدي وايي:« په بلخ کې د ښارګوټو وېشل له څو اړخونو اهمیت لري. له اقتصادي، اجتماعي او امنیتي پلوه او دغه راز د نفوسو د ودې، اقلیمي مهاجرتونو او له ګاونډیو هېوادونو د اخراج شویو مهاجرانو د مدیریت له امله هم اهمیت لري.»
په ورته مهال، د مزارشريف ښار هغه شمېراوسېدونکي چې په دې ښارګوټي کې یې ځمکې اخیستې، خوښ دي چې د ځايي چارواکو له لوري پر دغو ځمکو شویو دعواوو ته یې حل لاره پیدا کړه او دوی ته یې د شرعي سندونو د وېش لړۍ پیل کړه.
د مزارشريف اوسېدونکی عبدالصبور وايي: « ډېر خوښ یم چې خپله قباله مې واخیسته. ځینو کسانو په دې اړه خبرې کولې چې دا ښارګوټی قانوني نه دی او نورې ستونزې لري، خو موږ نن خپلې شرعي قبالې د ټولو حکومتي ادارو په شتون کې ترلاسه کړې.»
د مزار ښار اوسېدونکی خلیل وايي: « ډېر خوشاله شوم چې زموږ ښارګوټی له جنجالونو خلاص شو او د خپلو نمرو شرعي قبالې مو ترلاسه کړې.»
د یادونې وړ ده چې مزارشريف ښار کې دغه نوی ښارګوټی پر شاوخوا ۷ زره جرېبه ځمکه جوړېږي چې دا مهال يې نږدې ۶۰ سلنه ځمکې پلورل شوې او د خلکو له لوري په کې د نویو کورونو د جوړېدو چارې پیل شوې دي.
