تحلیل کوونکي: نړیوال غواړي پر اسلامي امارت فشار راوړي

د جمهوریت له پرځېد او اسلامي امارت واک ته رسېدو سره د امریکا په ګډون ګڼو هېوادونو کابل کې د خپلو سفارتونو دروازې وتړلې،ډېری لاهم نه دي خلاص شوي،خو ځنې سفارتونه بیا په مشروط ډول فعال دي.

تازه د جرمني او اندوونیزیا په ګډون یو شمېر هېوادونو ژمنه کړې،چې په کابل کې خپل سفارتونه پرانیزي،خو زیاتوي چې دا د اسلامي امارت پر رسمیت پېژندلو په مانا نه ده، هغه څه چې تحلیل کوونکي یې په نړیوالو اوصولو کې یو نوی او په سیاسي لحاظ بې مانا کار بولي.

د سیاسي چارو شنونکی بلال فاطمي وايي:«که دوی په زور راځي،دفترونه پرانیزي او طالبانو ته اجازه نه ورکوي،چې دوی هلته دفترونه پرانیزي دا په ډیپلوماټیکه نړۍ کې یو نوی کار دی،چې د نړیوالو اصولو له مخې هېڅ مانا نه لري.»

له دې سره یو شمېر نور شنونکي بیا  په دې باور دي،چې ځېنې هېوادونه د خپلو ګټو د خوندیتوب لپاره پر اسلامي امارت فشار راوړي او غواړي خپلې غوښتنې پرې ومني.

د سیايي چارو شنونکی  اجمل سهیل وايي:« ځېنې حقوقي مسایل دي،چې هغه د لږکیو مسایل، د ښځو مسایل همدارنګه ځنې ډیموکراټیک ارزښتونه دي،چې وده ورکړل شي نو پر طالبانو لازم فشار راوستلی شي نو د خبرو یوې دریچې او بنسټ خلاصولو لپاره اړینه ده،چې هېوادونه خپل ډیپلوماتان راواستوي.»

خو د بهرنیو چارو وزارت غبرګون دا ده،چې نړیوال د امریکا وروستۍ پرېکړې ته انتظار کاږي او دوی په خپلواکه توګه نه شي کولای کابل سره رسمي اړیکې ولري.

د بهرنیو چارو وزارت د ستراتیژیکو مطالعاتو مشر ولي الله شاهین وايي:« نړۍ وال تقریبا خپلو پرېکړو کې مستقلانه پرېکړې نه شي کولای منتظر دي،چې د امریکا متحده ایالات څه پرېکړه کوي. له دې وروسته به دوی هم پرېکړې کوي،خو دا د وخت مسله ده. دا مسله زیاته د اروپایي هېوادونو او له امریکا سره ده،یوه نفساني ستونزه ده چې خلک خپل څنګه قانع کړي.»

د بهرنیو چارو وزارت په وینا امریکا او اروپایي هېوادونه نفساني ستونزه لري،هغوی خپلو ملتونو ته دا قناعت نه شي ورکولی،چې افغانستان ته په تېرو شلو کلونو کې د څه لپاره تللي وو او هلته ولې دوی قرباني ورکړه.