د پلازمېنې کابل په شمول د ۳۳ ولایتونو د زندانونو رییسانو او آمرانو ته د رهبرۍ، ادارې د تنظیم او د زندانونو د سالمې ساتنې ترعنوان لاندې جوړ شوی ۱۵ ورځینی سیمینار پای ته ورسېده.
د دې سیمینار په پای غونډه کې د اسلامي امارت د بېلابېلو ادارو چارواکو ګډون کړی و.
د زندانونو ولایتي او مرکزي رییسانو ته د دې ورکړل شوي سیمینار موخه د زندانونو د ساتنې او اداري چارو د سمون ترڅنګ، له زندانیانو سره ښه چلن یاد شوی.
د زندانونو چارو سمون ادارې د کارکوونکو چارو رییس ضیا الرحمان سید وايي: « له دې سیمینار هدف دا دی چې د ۳۴ ولایتونو مسوولینو یا مرستیالانو ته له بندیانو سره د سم او اسلامي چلن لارې ور زده کړو. له بندیانو سره باید اسلامي چلن او ښه برخورد وشي، زنداني ته تکلیف ونه رسېږي، وږی او تږی پاتې نه شي.»
په ورته مهال، د امربالمعروف او نهې عن المنکر وزارت د شکایتونو اورېدلو چارو معین مولوي صدیق الله وايي، له مجرم د محکمې د پریکړې پر اساس آزادي اخیستل شوې چې همدا یې د اصلاح لپاره ستر تعزیب دی او له دې پرته په زندانونو کې ورسره ناسم چلن او ربړونه په اسلام کې نه شته.
هغه زیاتوي:« څنګه چې محکمې دوی ته حکم وکړ، دا د ده د تأدیب او اصلاح لپاره کافي او شافي دی. له دې ها خوا ګواښل، لوږې تندې پرې زغمل او شکنجې ورکول د اسلام په دین کې نه شته.»
د زندانونو چارو سمون ادارې د نظامي چارو مرستیال لوی پاسوال حبیب الله بدر د افغانستان په ټولو زندانونو کې د زندانیانو شکنجه او ربړونه په کلکه ردوي او زیاتوي، چاته اجازه هم نه ورکوي چې له بندیانو سره ناسم چلن وکړي.
بدر وايي، که داسې موارد په لاس ورشي چې بندیان شکنجه شوي، له عاملان به یې د قانون منګولو ته وسپاري.
بدر زیاته کړه:« هېچا ته به اجازه هم ورنه کړم چې زندانونو چارو سمون اداره کې محبوسینو ته وهل، ټکول او تعذیر ورکول ورکړي. دا مې رسنیو کې هم ویلي او نمایشي حرکتونه نه ترسره کوم. که چا ته معلوم وي، د زندانونو چارو سمون ادارې ته دې راشي، زه به عاملین سبا عدلي او قضايي ارګانونو ته وسپارم. که دا سرباز وي، که قوماندان وي، که رییس یا جنرال.»
د سیمینار ګډونوال بیا خوښ دي او زیاتوي چې له زندانیانو سره د چلن او اداري چارو د سمون په برخه کې له ۱۵ ورځیني ورکشاب داسې مسایل زده کړي چې په عملي چارو کې ورته ګټور تمامېدای شي.
د پروان ولایت د زندان رییس عبدالرحیم احد وايي: « موږ په دې پوه شوو چې څه ډول له خپلې رهبرۍ او ماتحت سره چلن وکړو، خپله اداره څه ډول کنټرول کړو، ادارې کارونه څنګه تنیظم کړو، د محبوسینو خدمت څه ډول وکړو او څه ډول یې روزنه ترسره کړو.»
په ټوله کې د زندانونو چارو سمون ادارې سپارښتنه دا وه چې باید د زندانونو مسوولین خپلې چارې په سمه توګه پرمخ یوسي او د بندیانو د اصلاح لپاره جدي کار وکړي، ترڅو سالم انسانان ټولنې ته وړاندې شي.
چارواکي وايي، په تېرو څو کالو کې له ۳ زرو زیات زندانیان د قرانکریم د حفظ له دورې فارغ شوي او زرګونه نورو ته په زندانونو کې حرفوي زده کړې ورکړل شوې دي.
