فراه ولایت چې د تېرو۲۰ کلونو جګړو له امله یو له ډېرو زیانمنو ولایتونو ګڼل کېږي، اوس یې د بیا رغونې او پراختیا لپاره جدي هڅې روانې دي.
د فراه ښاروالۍ مسوولین وايي، په دې ولایت کې یې د ۲۸ لویو او کوچنیو پروژو کارونه د ۱۸۰ میلیونه افغانیو په ارزښت پیل کړي دي.
دوی زیاتوي، دغو پروژو کې د سړکونو اسفالت او داغ نیونه، د کانالونو او لښتیو جوړول، ښاري ښکلا او روښنایي، د شنې ساحې پراختیا او نورو برخو کې پروژې شاملې دي چې د روان مالي کال تر پایه به یې چارې د یادې ادارې له بودیجې بشپړې شي.
د فراه ښاروال سردار محمد مرصاد وايي: « په ۱۴۰۳ کال کې زموږ د ښاروالۍ د عوایدو هدف ۵۰ میلیونه افغانۍ و، خو ۱۴۰۴ مالي کال کې موږ شاوخوا ۲۵۰ میلیونه افغانۍ عواید راټولو هدف اېښی او تمه لرو چې پوره به یې کړو. ښکاره خبره ده چې له ډېرو عوایدو سره ښار هم پراختیا کوي. زه ژمنه کوم چې د ښار د ښکلا او آبادۍ لپاره به کوټلي ګامونه پورته شي.»
بله خوا، د فراه یو شمېر اوسېدونکي د یادو پروژو پلي کول د ښاري نظم او د چاپېریال ښکلا لپاره مهم بولي او د ورته پروژو پر زیاتوالي ټینګار کوي، تر څو د دوی په خوله، له امله یې خلګو ته د کار زمینه هم برابره شي.
د فراه اوسېدونکی محمد رسول وايي: « له دې وړاندې هېڅ رسېدنه نه وه، اوس پاملرنه ډېره شوې، خو موږ له دې د ډېرې پاملرنې غوښتنه لرو.»
د فراه یو بل اوسېدونکی میراجان وايي: « اوس فراه ته پاملرنه ډېره شوې، پخوا دومره نه وه. زموږ د خاک سفېد ولسوالۍ سړک هم جوړ شو او ښار هم مخ په ښایسته کېدو دی.»
د فراه اوسېدونکی فقیر احمد وايي: « د خدای شکر دی، هرڅه ښه روان دی، سړکونه او چوکونه جوړ شوي، مهاجرینو ته هم اسانتیاوې برابرې شوې، ښه دی چې کارونه وشي او خلکو ته د کار زمینه برابره شي.»
فراه ولایت د هېواد په لوېدیځ کې موقعیت لري، په تېرو کلونو کې د ناامنۍ، د زېربناوو نه شتوالي او د مخکېني حکومت د نه پاملرنې له امله د هېواد له محرومو ولایتونو شمېرل کېده. اوس چې امنیتي وضعیت څه ناڅه ښه شوی، ځایي مسوولینو یې پر رغولو او بیا رغولو تمرکز کړی.
